„Það hefur trosnað mjög úr starfsemi fýlupúkafélagsins. Ég er hættur í pólitík, Haraldur Benediktsson orðinn bæjarstjóri á Skaganum og Óli Björn áhrifalaus í þingflokknum að eigin ósk.“ Þannig hefst nýleg Facebook-færsla formanns Fýlupúkafélagsins, Brynjars Níelssonar. Telur hann aðalfund félagsins í haust verða daufur og notar tækifærið til að skjóta létt á tvo fyrrverandi:
„Það verður sennilega dauft á aðalfundinum í haust, sem er þó ekki óþekkt, eins og nafn félagsins gefur til kynna. Tvær umsóknir liggja fyrir um inngöngu í félagið, annars vegar frá fyrrverandi forsætisráðherra og hins vegar frá fyrrverandi dómsmálaráðherra, sem enginn skilur af hverju er ekki löngu kominn með fulla aðild.“
Þá segist Brynjar hafa fengið boð um að ganga í annað félag og nefnir þrjú skilyrði sem þarf að uppfylla til að komast í það félag. Segir hann Sigmund Davíð Gunnlaugsson vera stofnandi félagsins en nefnir ekki hvort um sé að ræða Miðflokkinn eða einhvern allt annað félag. Í lokaorðum sínum getur Brynjar ekki stillt sér um að skjóta á vinstri menn, sem fara mikið í taugarnar á hægri manninum.
„Mér hefur borist boð um aðild að nýju félagi. Þrenn skilyrði eru fyrir inngöngu í það félag og verður að uppfylla þau öll. Í fyrsta lagi þarf að vera einstaklega hallærislegur í klæðaburði. Helst að ganga í rugbytreyjum við öll tilefni en einhverra hluta vegna mega feitlagnir ekki vera í þverröndóttum treyjum. Í öðru lagi þarf hollningin að vera sérstök að öðru leyti, til dæmis, útlit, göngulag og aðrar hreyfingar. Í þriðja lagi þarf að fara í verulega í taugarnir á stjórnsömum vinstri mönnum, sem sitja gjarnan fyrir framan tölvuna með samanbitnar varir og krepptan hnefa í vasa og reynir að sannfæra aðra hvað það er gott fólk og réttlátt.Mér skilst að stofnandi þessa félags sé Sigmundur nokkur Davíð. Ég uppfylli öll skilyrðin til inngöngu, sem er mjög sjaldgæft. Til að mynda komst Stefán Einar ekki inn þar sem hann uppfyllti ekki skilyrði 2 og Hannes Hólmsteinn ekki út af skilyrði 1. En báðir upfylltu skilyrði 3 með miklum glæsibrag, eins og margir aðrir.“
Athugasemdir