Franska leik- og söngkonan fyrrverandi og dýraverndarsinninn Brigitte Bardot varð níræð í fyrradag en fyrir 18 árum síðan tjáði hún sig við DV um ísbjarnardráp í Skagafirði og er óhætt að segja að hún var allt annað en ánægð með gjörninginn.
Á dögunum var ísbjarnarhúnn skotinn til bana í Jökulfjörðum fyrir vestan og eins og alltaf, sýndist sitt hverjum með þau dráp. Flestir telja slíka ógn stafa af hvítabirninum að vissara sé að skjóta þá á færi ef þeir sjást hér á landi á meðan sumir eru á þeirri skoðun að betra væri að svæfa þá og flytja síðan aftur á heimaslóðir, enda um að ræða dýrategund sem á mjög undan högg að sækja vegna hlýnunar jarðar.
Árið 2006 sást ísbjörn í Skagafirði og var aflífaður aðeins tveimur klukkustundum síðar. DV heyrði í Brigitte Bartot af því tilefni enda er hún einn þekktasti dýraverndarsinni heims, þá sem nú. Spurði fjölmiðillinn Bardot hvað henni fyndist um bjarnardrápið og hún svara afdráttarlaust. „Þvílíkt hneyksli! Þetta er smánarlegt! Þetta er örvænting!“ sagði fyrirsætan fyrrverandi við blaðamann DV. Bætti hún við að dráp virðist vera lausn mannsins við öllum vandamálum. Erfitt er að rökræða gegn því.
Þá talaði DV einnig við Paul Watson, leiðtoga Sea Shepherd en hann kallaði Íslendinga bleyður.
Hér má lesa umfjöllun DV í heild sinni:
DRÁPIÐ HEFUR AFLEIÐINGAR
Brigitte Bardot leikkona, söngkona og fyrrverandi fyrirsæta, fordæmir ísbjarnardrápið í Skagafirði í síðustu viku. Hún segir málið vera hneyksli og sýna fram á að dráp sé eina lausn mannsins við vandamálum hans. „Aumingjans jörðin er að deyja jafnt og þétt og við með henni,“ segir Bardot við DV. Paul Watson, leiðtogi Sea Shepherd, tekur í svipaðan streng.
„Þvílíkt hneyksli! Þetta er smánarlegt! Þetta er örvænting! Hvert sem vandamálið virðist vera hefur maðurinn aðeins eina lausn á því. Að drepa! Drepa! Drepa!,“ segir leikkonan, söngkonan og fyrrverandi fyrirsætan Brigitte Bardot við DV um þá ákvörðun Íslendinga að aflífa hvítabjörn sem gekk á land í Skagafirði í síðustu viku. Bardot er þekkt fyrir störf sín í skemmtanabransanum, en hún lagði upp laupana á þeim vettvangi að mestu á áttunda áratug síðustu aldar og sneri sér að vernd dýra. Bardot var að mestu í sviðsljósinu á sjöunda áratug síðustu aldar og markaði sér sess ásamt Marilyn Monroe sem ein kynþokkafyllsta leikkona þeirra tíma. Er Bardot nú forsvarsmaður dýraverndunarsamtakanna Foundation Brigitte Bardot. Höfuðstöðvarnar eru í París í Frakklandi og njóta samtökin stuðnings um 60 þúsund aðila frá 60 þjóðlöndum.
Vantar viðbragðsáætlun
DV spurði Bardot álits á því að hvítabjörn sem kom til landsins hefði verið aflífaður. Hún segist harma mjög að ákveðið hafi verið að bregðast við með þessum hætti og efast um að litið hafi verið nægilega á aðra kosti í stöðunni. Eins og greint hefur verið frá sást fyrst til bjarnarins um klukkan tíu um morguninn og var hann skotinn um tveimur klukkustundum síðar. Var hann aflífaður með vísan til þess að hann hafi verið talinn ógna öryggi fólks í nágrenninu. Dýralæknar hafa meðal annars gagnrýnt að engri viðbragðsáætlun sé haldið úti á Íslandi hvað varðar komu dýra sem þessara til landsins. Umhverfisráðuneytið hyggst fara ofan í saumana á málinu, en kallað hefur verið eftir þessari áætlun frá árinu 1988 þegar síðasti hvítabjörn gekk hér á land.
Ástæðurnar ekki marktækar
„Þessi heilaga regla um að hafa öryggið í fyrirrúmi er orðin að afsökun fyrir því að útrýma öllu því sem er hreint og fagurt á jörðinni. Aumingjans jörðin er að deyja jafnt og þétt og við með henni,“ segir Bardot sem segist hneyksluð á framferði sem þessu. Skoðanir Bardot hafa verið mjög umdeildar og hefur mörgum þótt þær vera róttækar. Einkum hafa það verið síðustu tveir áratugir sem hafa fallið misvel í kramið hjá fólki, þar sem hún hefur talað opinskátt um samfélag múslima og samkynhneigða. Hefur hún hlotið nokkra dóma fyrir meiðyrði og féll sá síðasti byrjun þessa mánaðar. Þar var hún dæmd fyrir að ýta undir kynþáttahatur. Þar kvartaði hún undan því að múslimar væru að eyðileggja Frakkland með því að þröngva siðum sínum upp á franska menningu. Var Bardot dæmd til að greiða jafnvirði um 1,8 milljóna króna í skaðabætur.
Segir Íslendinga vera skræfur
DV hafði einnig samband við Paul Watson, leiðtoga Sea Shepherd-samtakanna, og spurði hann álits á aflífun hvítabjarnarins. Skoðanir Watsons hafa einnig verið umdeildar en hann sökkti sem kunnugt er íslenskum hvalveiðiskipum í Reykjavíkurhöfn árið 1986. Hann fordæmir dráp Íslendinga á hvítabirninum. Hann segir þá sem skutu hann vera gungur. „Bandarísk stjórnvöld settu ísbirni á lista yfir dýr í útrýmingarhættu í síðasta mánuði. ísbirnir eiga í vök að verjast vegna hlýnunar jarðar og það er væntanlega ein af ástæðum þess að hann kom alla leið til fslands. Mér er brugðið að norrænir menn skuli vera svo hræddir við samborgara sína úr hánorðri að þeir þurfi að skjóta þá. Þeir sem skutu ísbjörninn eru vistfræðilega fávísir og algjörar gungur,“ segir Watson. DV spurði þau Watson og Bardot einnig út í hvort þau hygðust grípa til einhverra sérstakra aðgerða vegna drápsins, líkt og með því að senda ríkisstjórn Íslands bréf þar sem ákvörðunin er gagnrýnd. Ekki vildu þau svara því að svo stöddu.
Athugasemdir