„Skemmtun er hugtak sem getur vafist fyrir okkur öllum. Í sólarlandaferðum í gamla daga var oft boðið um á dagsferðir um nágrennið sem menn greiddu fyrir eftirá. Virðuleg miðaldra kona harðneitaði að greiða fyrir eina slíka ferð á þeim grundvelli að þarna hefði verið auglýst skemmtiferð sem reyndist síðan ekkert skemmtileg. Þessi saga kom upp í hugann þegar ég horfði á Vikuna með einhverjum Gísla á RÚV síðasta föstudag.“ Þannig hefst færsla Brynjars Níelssonar, spéfugli og frambjóðanda Sjálfstæðisflokksins fyrir komandi kosningar, sem hann birti á Facebook í hádeginu en þar lét Hallgrímur Helgason gamminn geisa og þóttu margir hann gefa Bjarna Benediktssyni og öðrum hægrimönnum kjaftshögg. Vinstri menn hafa fagnað Hallgrími í hástert eftir þáttinn en hægrimenn eins og Brynjar hafa verið minna hrifnir. Eins og sést í færslunni. Hún heldur áfram:
„Mér skilst að þessi vika með Gísla sé skemmtiþáttur, að minnsta kosti auglýstur sem slíkur, þar sem einkum frægt og sjálfhverft fólk kemur til að upphefja sjálfan og níða aðra niður. Skilst einnig að þáttastjórnandinn gefi ekkert eftir í þeim efnum á sinn einstaklega fyndna hátt. Öfugt við skemmtiferðirnar í sólarlöndum greiðir maður fyrirfram fyrir skemmtunina á RÚV.
Í þessum þætti birtist gamall skólafélagi úr MH, sem síðar varð þekktur skattakóngur árum saman, stífbónaður í flottum fötum með rándýr gleraugu. Hann hefur greinilega ekki áttað sig á því að reiðir menn, sem hlægja mest sjálfir að eigin fyndni, eiga ekkert erindi í skemmtiþátt. Þeir eiga meira erindi í umræðuþátt á Samstöðunni um óréttlæti heimsins og mannvonsku annarra.“
Að lokum segir Brynjar að honum þyki Silfrið á RÚV mun betri skemmtiþáttur.
„Sjálfum finnst mér Silfrið miklu meiri skemmtiþáttur. Í gær urðu áhorfendur vitni að nýju meti í lurðuskap og lítilli sjálfsvirðingu. Svo fannst mér merkilegt að hægt væri að finna stjórnmálamann sem er minna glaðlegur en ég. Eins og lesa má hefur vel tekist til hjá mér á jákvæðninámskeiðinu hjá Óttari Guðmundssyni, geðlækni. Mættu fleiri panta sér tíma.“
Athugasemdir