Hótel Vatnsholt er staðsett í um það bil 16 kílómetra fjarlægð austan við Selfoss eða nánar tiltekið í gamla Villingaholtshreppi og núverandi Flóahreppi. Bæjarstæðið hefur stórkostlegt útsýni og frá Vatnsholti sést vel til Vestmannaeyja, Eyjafjallajökuls, Tindfjalla, Heklu og upp á hálendið.
Hjónin Jóhann Helgi Hlöðversson og Margrét Ormsdóttir keyptu jörðina árið 2005 og ætluðu að búa í skjóli við eril borgarinnar. Þau reka einnig fyrirtækið Jóhann Helgi & Co sem sérhæfir sig í heildarlausnum á leik- og íþróttasvæðum og var stofnað árið 1990. Jörðin og allur húsakostur var í mikilli niðurníðslu en strax var ráðist í miklar endurbætur. Í fjármálahruninu árið 2008 þrengdi verulega að, þar sem bæjarfélögin héldu að sér höndum í endurnýjun leiksvæða, og sáu hjónin sér þann kostinn vænstan að flytja í kartöflugeymsluna, þar sem þau bjuggu í fimm ár, á meðan þau stofnsettu Ferðaþjónustuna í Vatnsholti árið 2010. Þar var í fyrstu boðið upp á 14 herbergi en í dag eru herbergin orðin 37.
Útihúsunum var breytt í veitingahús og sal þar sem boðið er upp á skemmtanir og einnig er hægt að halda þar fundi eða ráðstefnur og er salurinn með leyfi fyrir 300 manns í sæti. Hótel Vatnsholt hefur reynst mjög vinsæll staður fyrir ýmsar uppákomur og salurinn verið nýttur til dæmis fyrir árshátíðir, brúðkaup, afmæli, starfsmanna- og hvataferðir auk funda og ráðstefna. Þá má einnig nefna að í Vatnsholt hafa streymt ferðamenn í þúsundatali á veturna í norðurljósaleit enda virðast aðstæður þar með eindæmum góðar og oft heiður himinn þótt annars staðar sé skýjað.
Það er nýlega búið að koma upp tjaldsvæði í Vatnsholti. Á svæðinu eru 44 rafmagnstenglar með 16 amp rafmagn.Tjaldsvæðið hefur hlotið fádæma góðar viðtökur nema hjá lúsmýinu sem virðist ekki hafa áhuga á að setjast þar að. Frábær aðstaða er til staðar fyrir fjölskyldur við tjaldsvæðið og má þar finna stórt leiksvæði með veglegum útileiktækjum. Þar er einnig stórt, opið svæði sem má nýta til boltaleikja og eru fótboltamörk á staðnum. Fyrir þá sem hafa gaman af að veiða er hægt að renna fyrir silung í Villingaholtsvatni.
Á veitingastaðnum er meðal annars boðið upp á rómaðar pizzur og pítur ásamt ísköldum á kantinum. Í sumar hafa ýmsir mætir tónlistarmenn troðið upp á laugardagskvöldum á milli kl 21-23, frítt er inn og dagskráin er auglýst á hotelvatnsholt.is.
Við hlökkum til að heyra frá ykkur á [email protected] Verið hjartanlega velkomin og við hlökkum til að sjá ykkur og tökum vel á móti ykkur. Kær kveðja frá Vatnsholti.
Athugasemdir