Árneshreppur – Paradís á hjara veraldar

Árnes­hreppur er eitt fámenn­asta og afskekktasta sveit­ar­fé­lag á Íslandi. Sveitin er útvörður Stranda og íbúar eru nú 43 tals­ins. Hreppa­mörk Árnes­hrepps eru í norðri við Geir­ólfs­gnúp sem einnig eru sýslu­mörk Stranda­sýslu og Norður-Ísa­fjarð­ar­sýslu. Að sunnan eru hreppa­mörkin við svo­kall­aðan Spena sem skilur á milli Árnes­hrepps og Kald­rana­nes­hrepps.  

Ein­stak­lingar hafa byggt upp ferða­þjón­ustu­fyr­ir­tæki, söfn og sýn­ingar og stofnað ný fyr­ir­tæki í ferða­þjón­ustu, bæði hvað varðar afþr­ey­ingu og aukið gisti­rými. Sund­laugin í Kross­nesi gekk í gegnum miklar end­ur­bætur sem Ung­menna­fé­lagið Leifur heppni stóð fyrir, en ung­menna­fé­lagið byggðir laug­ina í Kross­nesi árið 1954 með hjálp sjálf­boða­liða.

Kross­neslaug er í næsta nágrenni við Atl­ants­hafið. Ljósmynd: westfjords.is

Árnes­hreppur nýtur þess að nátt­úran er stór­brotin og fögur. Hægt væri að nefna hvert fjallið á fætur öðru sem standa vörð um firði og víkur, kletta­borgir, frá­bæra strand­lengju með ýmist mal­ar­fjörum eða hömrum í sjó fram, ásamt fal­legum sand­fjörum í botnum fjarða. Þar sem dreif­býlið er mikið í sveit­ar­fé­lag­inu er nán­ast alls staðar hægt að finna kyrrð og ró og verða eitt með nátt­úr­inni. En samt sem áður hefur ferða­mönnum fjölgað með hverju ári og árið 2020 var þar engin und­an­tekn­ing þrátt fyrir að vera mjög sér­stakt og for­dæma­laust ár eins og sagt hefur verið ótal sinnum. Straumur Íslend­inga lagði leið sína í sveit­ina og var ótrú­lega gaman fyrir ferða­þjóna að taka nán­ast ein­göngu á móti löndum sínum sem virki­lega nutu þess að koma og skoða sig um. Margir voru að koma í fyrsta sinn og urðu alveg bit á sjálfum sér að vera ekki löngu búin að sækja Árnes­hrepp heim.  Þegar haustaði tók við kvik­mynda­æv­in­týri sem lengdi sum­ar­ver­tíð­ina fram eftir hausti og unnu heima­menn að því í góðu sam­starfi, hver á sínu sviði, að leysa öll mál sem leysa þurfti. Þar má meðal ann­ars nefna að bænd­urnir í sveit­inni kenndu leik­ur­unum að slá með orfi og ljá, snúa heyi með hrífum og að skera hrút sem auð­vitað var bara í plati. 

Árnes­hreppur stendur nú á þeim tíma­mótum að fyrir dyrum stendur að þrí­fösun og ljós­leið­ara­væð­ing ná hingað í sveit­ina. Þá skap­ast auknir mögu­leikar til nýbreytni í atvinnu­lífi sem ekki hefur verið hægt að sinna fram að þessu. Þar má nefna alls kyns tölvu­vinnslu, svör­un­ar­þjón­usta og mögu­leikar bænda til sölu beint frá býli myndi loks­ins ræt­ast með betri raf­orku.

Í Norð­ur­firði má finna gist­ingu, mat­vöru­verslun og kaffi­hús og auð­vitað fal­lega smá­báta­höfn. Ljósmynd: westfjords.is

Gistingu má finna á eft­ir­töldum stöðum; Hótel Djúpavík ehf, Ferða­þjón­ustan Urð­ar­tindur, Ferða­fé­lag Íslands, Bergistangi gisti­heim­ili og á næsta ári bæt­ist aftur við Finn­boga­staða­skóli sem er að mestu leiti í fríi þetta árið. 

Veit­ingar eru seldar á Hótel Djúpavík og Kaffi Norð­ur­firði. Tjald­svæði eru tvö bæði í Norð­ur­firði, hjá Urð­ar­t­indi og Ferða­fé­lag­inu. Norð­ur­fjarð­ar­höfn hefur mikið aðdrátt­ar­afl, þar er rekin blóm­leg smá­báta­höfn og fyr­ir­tæki í báts­ferðum fer þaðan norður á Horn­strandir. 

Rúsínan í pylsu­end­anum er svo Kross­neslaug sem stað­sett er í landi Kross­ness, sem er rétt fyrir norðan Norð­ur­fjörð.  Söfn og sýn­ingar eru á eft­ir­töldum stöðum; Í Síld­ar­verk­smiðj­unni í Djúpavík er Sögu­sýn­ing Djúpa­víkur sem er fasta­sýn­ing, þar er farið um með leið­sögn á hverju, degi kl. 10:00. Á sumrin er einnig sett upp árleg lista­sýn­ing undir heit­inu The Factory og stand þær yfir­leitt í 3 mán­uði, þar er ókeypis aðgangur. Minja- og hand­verks­húsið Kört í Tré­kyllis­vík er með fasta sýn­ingu á gömlum munum, að mestu leiti úr sveit­ar­fé­lag­inu og enn­fremur er selt þar gæða hand­verk.