Gossip Girl leikarinn Ed Westwick tilkynnti á samfélagsmiðlum fyrr í vikunni að hann hefði eignast sitt fyrsta barn með Amy Jackson, eiginkonu sinni. Um er að ræða dreng sem hefur fengið nafnið Oscar Alexander Westwick.
Feril Westwick hefur séð betri daga en síðan Gossip Girl þættirnir hættu í framleiðslu árið 2012 hefur leikarinn ekki fengið mörg bitastæð hlutverk.
Westwick var á sínum tíma einn vinsælasti leikari heims og fengu Íslendingar að kynnast því þegar mörg hundrað stelpur eltu hann niður Laugaveginn árið 2010 þegar hann var á landinu. Fyrirsætan Lilja Ingibjargardóttir sagði í samtali við DV á sínum tíma að leikarinn hafi verið mjög dónalegur meðan heimsókn hans stóð yfir en hún skemmti sér með honum.
„Konur hrifust af honum og sóttu að honum en hann var drukkinn og brást illa við. Hann sparkaði í stelpur, grýtti myndavélum þeirra í jörðina og kom illa fram við þær. Hann vildi endilega fá mig með sér á hótelherbergið sitt en ég bauð honum hins vegar að koma með mér og vinkonu minni því við vorum að fara á Austur. Ég lét hins vegar undan og við fórum báðar tvær með honum upp á herbergi,“ sagði Lilja við DV um kynni sín af leikaranum en þegar upp á herbergi við komið ljóst að Westwick vildi stunda kynlíf með Lilju. „Ég hafði engan áhuga á því og ekkert varið í strákinn. Hann er hrokafullur og algjör ruddi. Við gerðum hins vegar gott úr þessu og fórum öll saman á English Pub og þaðan á Austur. Þar varð hann eftir og var í góðu gamni þegar við fórum. Hann sýndi ekki sínar bestu hliðar, það er alveg á hreinu.“
Þá var Westwick sakaður um tvær nauðganir árið 2017 en tekin var ákvörðun árið 2018 að hann yrði ekki ákærður.
Athugasemdir