Bónus fagnar nýjum einstaklingum með veglegri gjöf. Barnabónus er nýtt verkefni sem Bónus hefur hleypt af stokkunum til að styðja við bakið á barnafjölskyldum og létta þeim lífið í þessum nýja kafla lífsins. Þetta kemur fram í fréttatilkynningu frá Bónus.
„Barnabónus er veglegur upphafspakki með nauðsynlegum vörum sem ættu að nýtast vel hinu nýfædda barni og foreldrum þess á fyrstu mánuðunum eftir fæðingu,“ segir Björgvin Víkingsson framkvæmdastjóri Bónus.
Í fréttatilkynningunni segir að Bónus hafi í 36 ár tekið þátt í að auka hagsæld á Íslandi og stuðlað að því að bæta lífsgæði fjölskyldna með því að bjóða nauðsynjavörur á kostakjörum. Fellur því þetta verkefni vel að stefnu og grunngildum Bónus, að því er fram kemur í tilkynningunni.
Finnsk fyrirmynd
„Hugmyndin að Barnabónus kemur upprunalega frá Finnlandi en Barnaboxið þar í landi hefur verið eitt af þekktustu og áhrifaríkustu félagslegu verkefnum Finna frá því fyrir miðja 20. öld,“ útskýrir Björgvin. Árið 1938 kom finnska ríkið Barnaboxinu á fót, til að styðja við bakið á nýjum foreldrum og draga úr útbreiddri fátækt í landinu. Boxinu var ætlað að tryggja aðgengi foreldra nýfæddra barna að nauðsynjavörum og búnaði og að öll börn fengju sömu tækifæri í upphafi, óháð fjárhagsstöðu foreldranna.
„Okkar Barnabónus er hugmynd af svipuðum toga, því okkur er annt um viðskiptavini og velferð þeirra. Við vonum að vörurnar í kassanum komi sér vel, en þær eru valdar í samvinnu við fagfólk,“ segir Björgvin.
Gjöf sem eykur vellíða
Bónus nýtur meðal annars leiðsagnar Helgu Reynisdóttur ljósmóður við val á vörum.
„Í boxinu verða vörur fyrir barnið en þessi tími, fyrst eftir fæðingu, er tími breytinga, undra og uppgötvana,“ segir Helga. Það sé því mikilvægt fyrir foreldra að þau séu í jafnvægi og sinni vel sinni andlegu og líkamlegu heilsu. „Svona gjöf er stór liður í því að auka vellíðan á þessum tíma og létta á fjárhagsáhyggjum hjá nýbökuðum foreldrum,“ segir Helga. Í Barnabónus er til dæmis að finna ungbarnagalla, bleiur, blautþurrkur, tannbursta og tannkrem, dömubindi, snuð, krem, andlitskrem fyrir móðurina, lekahlífar, Milt þvottaefni, og margt fleira.
Það eina sem þarf að gera til að fá slíkan Barnabónus er að skrá sig á bonus.is/barnabonus. Andvirði hverrar gjafar er talsverður og fjöldi samstarfsaðila sem þarf til þess að koma svo stóru verkefni á laggirnar.
„Við erum afskaplega þakklát fyrir hve vel samstarfsaðilar okkar tóku í þessa hugmynd og hjálpuðu okkur að gera hana að veruleika,“ segir Björgvin.
Sjálfboðaliðar gefa vinnu sína til styrktar Gleym mér ei
„Það er mikil vinna sem liggur að baki svona verkefni,“ útskýrir Björgvin en Bónus naut aðstoðar fjölda sjálfboðaliða sem gefa vinnu sína til styrktar Gleym mér ei.
„Ein af lykilstoðum verkefnisins er að styðja við öll börn í landinu og því teljum við mikilvægt að styðja við bakið á öllum foreldrum og það er heiður að styrkja félag eins og Gleym mér ei,” segir verkefnastjóri verkefnisins, Pétur Sigurðsson.
„Allt í allt gerum við ráð fyrir að gefa 5.000 Barnabónusbox á þessu ári, samtals að andvirði a.m.k. 150 milljóna króna,“ segir Björgvin. „Vonandi verða gjafirnar mikil búbót fyrir fjölskyldur á þessum tímamótum í lífi þeirra og létta undir með þeim, en eins og við vitum öll þá fylgir því ærinn kostnaður að eignast barn.“
Athugasemdir