Þorgerður Katrín Gunnarsdóttir utanríkisráðherra tók í gær á móti Battsetseg Batmunkh, sem er fyrsti utanríkisráðherra Mongólíu til að heimsækja Ísland síðan ríkin tóku upp stjórnmálasamband fyrir fimmtíu árum en greint er frá þessu á vef stjórnarráðsins.
Við þetta tækifæri undirrituðu ráðherrarnir viljayfirlýsingu um aukið pólitískt samráð milli ríkjanna. Á fundi sínum ræddu þær einnig um frekari möguleika til samstarfs, meðal annars á sviði jafnréttismála.
Ísland og Mongólía hafa um langt skeið átt í samstarfi á sviði landgræðslu, og hafa nemendur frá Mongólíu stundað nám við Landgræðsluskóla GRÓ. Í heimsókn sinni mun ráðherrann heimsækja skólann, ræða við mongólska nemendur sem þar stunda nám og kynna sér jafnframt starfsemi jafnréttis- og jarðhitaskóla GRÓ.
Batmunkh átti auk þess fund með Höllu Tómasdóttur forseta Íslands á Bessastöðum og hitti Þórunni Sveinbjarnardóttur, forseta Alþingis, og Pawel Bartoszek, formann utanríkismálanefndar Alþingis, á meðan dvöl hennar á Íslandi stóð.
Athugasemdir