Í dagbók lögreglu frá því í nótt er greint frá því að óskað hafi verið eftir aðstoð lögreglu við að vísa manni úr húsnæði þar sem hann var óvelkominn. Maðurinn hafði uppi ógnandi hegðun og var mjög ölvaður. Hann hlýddi engum fyrirmælum um að yfirgefa húsnæðið og var í engu ástandi til þess að valda sjálfum sér né til þess að vera á meðal almennings. Hann var handtekinn og vistaður í fangageymslu þar til rennur af honum víman.
Þá ætluðu Lögreglumenn að gefa sig á tal við mann sem var grunaður um fíkniefnasölu. Þegar hann sá lögreglumenn þá reyndi hann að flýja í burt á hlaupahjóli. Honum var veitt eftirför og hann losaði sig í kjölfarið við hlaupahjólið og hélt áfram för á fæti. Lögreglumennirnir náðu honum þó fljótt. Reyndist maðurinn með nokkuð magn fíkniefna á sér í söluskömmtum ásamt talsverða fjármuni sem grunur leikur á að sé ágóði fíkniefnasölu. Maðurinn var fluttur á lögreglustöð og þar kom í ljós að hann var ekki með fullnægjandi skilríki til þess að gefa deili á sér.
Þrír ökumenn voru stöðvaðir og grunaðir um að aka bílum sínum undir áhrifum og voru tveir þeirra án ökuréttinda.
Tilkynnt var um mann með mikil læti og í annarlegu ástandi í fjölbýlishúsi. Hann hafði farið mikinn í íbúð, stigagangi og við húsið svo það var ekki svefnfriður. Maðurinn var handtekinn og vistaður í fangaklefa þar til það rennur af honum víman.
Tilkynnt var um bílveltu. Þar hafði bifreið verið ekið fram af grasbarði og endað á hliðinni. Ökumaður var með minniháttar áverka og var fluttur á slysadeild.
Athugasemdir