Svo virðist sem að verðbólga verði þrálát út þetta ár hið minnsta og gert er ráð fyrir því að hún hækki lítillega á næstu mánuðum. Verður líklega um fjögur prósent í lok ársins.
Á mannamáli þýðir þetta að stýrivextir verða mjög líklega ekki lækkaðir frekar á þessu ári.
Árstíðabundin hækkun flugfargjalda hefur mestu áhrifin á hækkun verðbólgu í júní, en verðbólga er nú 3,8 prósent og hefur farið hægt niður á við það sem af er þessu ári.
Frekari hjöðnun er ekki að finna í kortunum næstu mánuði, samkvæmt hagfræðingum Landsbankans, því reiknað er með því að hún aukist lítillega.
Eins og staðan er núna er gert ráð fyrir að verbólga verði 3,9 prósent í júní og munar þar mest um hækkun flugfargjalda, er jafnan hækka í veðri vegna aukinnar eftirspurnar á þessum árstíma. Þá hefur hækkun húsaleigu einnig áhrif.
Hins vegar kemur á móti að bensínlítrinn lækkar í verði, og þá eru að finna vísbendingar um að hægst hafi á hækkun matvöru sem hefur verið talsverð á síðustu mánuðum.
Gert er ráð fyrir því að ársverðbólga muni vaxa síðsumars þótt að vísitalan hækki lítillega og er ástæðan fyrir því sú að árið 2024 voru skólagjöld í nokkrum háskólum felld niður og skólamáltíðir urðu gjaldfrjálsar. Og því falla þessir liðir út úr 12 mánaða mælingunni, en gert er ráð fyrir því að verðbólga í árslok verði fjögur prósent.
Seðlabanki Íslands hefur að undanförnu lækkað stýrivexti í takt við hjöðnun verðbólgu.
Stýrivextir eru nú 7,5 prósent og haldist peningastefna Seðlabankans óbreytt má gera ráð fyrir því að þeir standi í stað út árið.
Athugasemdir