Full ástæða er til að hafa miklar áhyggjur af hraðakstri á höfuðborgarsvæðinu, en frá því um miðja síðustu viku hafa hundruð ökumanna verið staðnir að hraðakstri segir í tilkynningu frá lögreglunni á höfuðborgarsvæðinu.
Samkvæmt lögreglu er oft um að ræða mjög gróf hraðakstursbrot og sem dæmi óku tveir um Suðurlandsveg á meira en 160 km hraða, en annar þeirra var ölvaður. Þá mældist að sögn lögreglu mældist bifreið á Reynisvatnsvegi á 115 þar sem leyfður hámarkshraði er 50 og í Arnarbakka ók ökumaður á rúmlega 100, en þar er 30 km hámarkshraði. Lögreglan segir að ljóst sé að ökumenn þurfi að staldra við og hugsa sinn gang, en með sama áframhaldi muni fara illa og alvarlegt slys hljótast af.
„Þegar kemur að akstri við framkvæmdasvæði tekur ekki mikið betra við. Þar hafa allnokkrir ökumenn, sem ekki virtu leyfðan hámarkshraða, verið sviptir ökuréttindum fyrir að hafa ekið á tvöföldum hámarkshraða og rúmlega það. Hér er sérstaklega vísað til Kringlumýrarbrautar, eða vegarkaflans á milli Miklubrautar og Háaleitisbrautar, en þar eru menn og tæki við vinnu mjög nálægt aksturbrautinni. Myndavélabíll lögreglunnar var staðsettur þar eftir hádegi í dag, en hámarkshraði á svæðinu er 30 vegna framkvæmdanna. Eftir vöktunina eiga 322 ökumenn von á sekt, en meðalhraði hinna brotlegu var 49. Fylgst var með ökutækjum sem var ekið Kringlumýrarbraut til norðurs og var brotahlutfallið 41%. Sjö óku á vel yfir 60 og fimm á meira en 70, en allir tólf ökumennirnir eiga yfir höfði sér sviptingu ökuréttinda, auk sektar,“ segir að lokum í tilkynningunni.
Athugasemdir