Flugmaður sem lenti í óhappi á Blönduósi á sunnudag hefur birt ítarlega frásögn á Facebook þar sem hann vill leiðrétta rangfærslur sem fóru á flug í kjölfar atviksins. „Mistök mín að áætla að lending á Blönduósi á sunnudaginn var þyrfti að vera kl. 16.30 urðu til þess að mörg ykkar héldu og halda jafnvel enn að ég og vinir mínir sem voru með í flugvélinni liggjum meira og minna slasaðir á sjúkrahúsi,“ skrifar hann í færslu sem birtist í gær, sem hann segist hafa skrifað svo fólk vissi „sannleika málsins fyrir óhappinu á Blönduósflugvelli.“
Flugmaðurinn, Magnús Ólafsson segir að vélin hafi verið í 3.500 feta hæð „fáeina kílómetra frá flugvellinum á Blönduósi“ þegar mótorinn stöðvaðist. Hann hafi þá beint vélinni að vellinum „eins og hver önnur sviffluga, mótorlaus.“ Flugmaðurinn reyndi tvisvar að koma vélinni í gang, án árangurs, en sá fljótt að hann kæmist á völlinn án mótors.
„Kom inn yfir flugvöllinn á kjörhraða í hæfilegri hæð og ekkert var annað eftir en lenda mjúklega,“ segir hann. Þá hafi nokkuð óvænt gerst
„Bensínlausa vélin hrökk í gang þar sem mér hafði láðst að skrúfa fyrir allt bensín.“ Þar sem bensíngjöfin var opin „rauk vélin eins og hestur sem fælist“ og flugvélin hækkaði skyndilega.
Þá hafi hann séð fram á að ekki næði að stoppa á brautinni. „Óvíst er að ég væri heill heilsu að skrifa þessi orð ef svo hefði farið,“ skrifar hann. Flugmaðurinn ákvað að nauðlenda utan brautar. „Á einhvern óskiljanlegan hátt tókst þessi nauðlending ótrúlega vel. Allir gengum við sjálfir frá borði.“
Enginn í vélinni þurfti sjúkrahúsvist en læknir og sjúkraflutningamenn á vettvangi tóku af hverjum og einum loforð um að láta vita ef einkenni kæmu síðar. „Við gáfum allir skýrslu hjá lögreglu hver í sínu lagi og síðan gátu allir farið til sín heima,“ segir flugmaðurinn.
Hann gagnrýnir að í fyrstu fréttum hafi verið talað um brotlendingu, þrátt fyrir að lögregla hafi sjálf séð áhöfnina ganga frá borði um hálftíma fyrr.
„Það hefði verið huggulegt fyrir alla þá sem á fréttir útvarps hlýddu ef þar hefði komið setning í þá veru að flugmaður og farþegar væru á gangi kringum vélina,“ skrifar hann og segir rangar fregnir um alvarleg meiðsli hafa valdið óþarfa áhyggjum.
Magnús endar færsluna á að þakka þeim sem sýndu hlýhug og sendu góðar kveðjur: „Öllum sem hugsuðu fallega til mín og sendu góða strauma til okkar félaganna þakka ég af alhug… Takið ekki mark á öllu sem þið lesið. Ást og friður.“
Athugasemdir