Jóhannes Valgeir Reynisson, frumkvöðull, verslunarmaður og stofnandi Bláa naglans, lést á hjartadeild Landspítalans við Hringbraut 12. september, 72 ára að aldri. Mbl.is greindi frá andlátinu.
Jóhannes Valgeir, sem flestir þekktu sem Valla, fæddist í Reykjavík 2. september 1953, sonur hjónanna Reynis Eyjólfssonar og Ragnheiðar Friðriksdóttur. Hann hóf ungur störf í fjölskyldufyrirtækinu Reynisbúð við Bræðraborgarstíg. Síðar lauk hann námi í matreiðslu við Hótel- og veitingaskólann árið 1986, samhliða störfum hjá Brauðbæ-Óðinsvéum.
Á starfsferli sínum kom Valli víða við sögu; hann var meðstofnandi Vega majóness, tók þátt í þróun graflaxsósu sem naut mikilla vinsælda, byggði upp hótelrekstur og stundaði útgerð bæði til sjóstangaveiða og lundaskoðunar. Hann hafði einnig umsjón með rekstri Víkurvagna, fjölskyldufyrirtækis, og var ötull í að koma hugmyndum í framkvæmd.
Í kjölfar bankahrunsins stóð hann fyrir smíði Þjóðarskútunnar, risavaxins sparibauks sem safnaði fé til styrktar mæðrastyrksnefndar.
Árið 2011 greindist Valli með blöðruhálskirtilskrabbamein. Hann skráði frá fyrstu stundu reynslu sína í kvikmyndaða dagbók sem síðar varð að heimildarmynd, frumsýnd í Hörpu og síðar sýnd í sjónvarpi. Í framhaldi stofnaði hann Bláa naglann sem varð vettvangur vitundarvakningar karlmanna með krabbamein og safnaði fé til tækjakaupa Landspítalans og annarra góðgerðarmála.
Valli var þekktur fyrir glaðværð og kímnigáfu og var traustur klettur síns fólks. Hann hélt jákvæðri lífssýn allt til hinstu stundar, eftir langa baráttu við hjartasjúkdóm.
Eftirlifandi eiginkona hans er Gyða Þórdís Þórarinsdóttir og synir þeirra Þórarinn Reynir, Ragnar Þór og Benedikt Rúnar. Barnabörnin eru þrjú.
Útför Jóhannesar Valgeirs fer fram frá Grafarvogskirkju fimmtudaginn 25. september kl. 15.
Athugasemdir