Vilhjálmur prins átti líklega lykilhlutdeild í því að „herða á ákvörðun“ föður síns, Karls konungs, um að grípa til aðgerða vegna deilna og hneykslismála sem tengjast yngri bróður hans, Andrési, að sögn sérfræðings um konungsfjölskylduna.
Karl konungur sparaði ekki stóru orðin þegar hann gaf út „miskunnarlausa“ yfirlýsingu eins og það er orðað í breskum fjölmiðlum, um hinn svívirta bróður sinn, og nú hefur sérfræðingur opinberað að Vilhjálmur hafi hjálpað föður sínum að koma inn „lokahögginu“.
Buckingham-höll greindi frá því á fimmtudag að formleg málsmeðferð væri hafin til að svipta Andrés aðals- og konunglegum titlum. Hann mun framvegis ganga undir nafninu Andrew Mountbatten Windsor, og hefur verið fjarlægður af opinberum lista breskra aðalsmanna.
Auk þess var staðfest að Andrés muni yfirgefa heimili sitt til margra ára, Royal Lodge, sem hefur verið tilefni mikillar gagnrýni undanfarnar vikur. Í nýrri skoðanakönnun töldu 80 prósent Breta að hann ætti að flytja úr glæsilega 30 herbergja húsinu sem stendur nærri Windsor-kastala.
Andrés hafði tryggt sér „steinmeitlaðan“ 75 ára leigusamning á húsinu árið 2003, sem þýddi að konungurinn gat ekki löglega neytt hans til að flytja, hann þurfti sjálfur að samþykkja það.
Síðustu mánuði hafa umræður og gagnrýni á Andrés og fyrrverandi eiginkonu hans, Söruh Ferguson, aukist á ný. Þau bjuggu saman í Royal Lodge þrátt fyrir skilnað á tíunda áratugnum. Enn meiri áfalli var bætt við þegar nýlega kom út bók eftir Virginia Giuffre heitinni, sem lýsir misnotkun sinni af hálfu barnaníðingsins Jeffrey Epstein.
Stuttu fyrir útgáfu bókarinnar tilkynnti Andrés að hann myndi sjálfviljugur gefa frá sér notkun á titlum sínum, en Karl konungur hefur nú gengið lengra og formlega svipt hann öllum konunglegum forréttindum. Sérfræðingar hafa kallað þetta „harðneskjulega en nauðsynlega ákvörðun“ sem Vilhjálmur hafi líklega stutt af heilum hug.
Andrew Lownie, höfundur bókarinnar The Rise and Fall of the House of York, segir við The Mirror að Vilhjálmur hafi líklega átt þátt í að styrkja föður sinn í þeirri trú að eitthvað formlegra yrði að gera. „Af því sem ég þekki til þeirra feðga held ég að Vilhjálmur hafi gegnt virku hlutverki í að herða ákvörðun Karls,“ segir Lownie. „Eftir að konungurinn varð fyrir hrópum og stöðugri gagnrýni í fjölmiðlum hefur hann áttað sig á alvöru málsins.“
Nú þegar Andrés flytur úr Royal Lodge vakna spurningar um framtíð hússins, sem vegna nálægðar við Windsor-kastala gæti reynst erfitt að leigja út. Lownie segir að „nú sé komið að því að ræða hvað verði um Royal Lodge í framtíðinni, en yfirlýsingin hafi þó tekist á við tvö helstu vandamál: titlana og eignina.“
Sérfræðingurinn telur mögulegt að Vilhjálmur og Katrín prinsessa flytji í húsið þegar Andrés flytur út. Þau hafi áður íhugað það þegar þau fluttu fjölskyldu sína frá London til Windsor til að tryggja börnum sínum meira næði en þau höfðu í Kensington-höll.
Parið hyggst þó flytja í nýtt heimili, Forest Lodge, á næstu vikum, en Lownie segir það „hljóma skynsamlegra“ ef þau tækju Royal Lodge í staðinn. „Ég held þau séu dálítið hikandi við að búa í svona stórhýsi, en staðsetningin er mjög hentug. Ég tel þetta sterkan möguleika,“ segir hann.
Að sögn The Mirror er þó líklegt að fjölskyldan haldi sig við áætlunina um Forest Lodge.
Andrés er sagður flytja í hús á Sandringham-jörðinni í Norfolk, sem Karl konungur á persónulega, en Sarah Ferguson mun sjálf þurfa að finna sér nýtt heimili. Katrín prinsessa er sögð „styðja fullkomlega“ ákvörðun Karls um að vísa Andrés úr húsi.
Lownie segir: „Þetta er snyrtileg lausn, þó hann fái væntanlega töluverða greiðslu fyrir að losa sig úr leigusamningnum. Þetta er loks afgerandi aðgerð sem hefði átt að koma fyrr, en betra er seint en aldrei.“
Hann bætir við: „Konungsfjölskyldan er að fjarlægja sig frá Andrési, og það með réttu. Þau vilja ekki að orðspor hennar skaðist frekar vegna tengsla við hann. Þetta er ekki endirinn á sögunni, en nauðsynlegt skref. Sérstaklega þar sem konungurinn hefur loks brugðist við af hörku.“
Lownie telur þó að hvorki Andrés né Sarah séu „laus úr snörunni“. Hann segir þau bæði þurfa að vinna með yfirvöldum í Bretlandi og Bandaríkjunum vegna tengsla sinna við Epstein.
„Það er miklu meira eftir,“ segir hann. „Við eigum enn eftir Epstein-skjölin, dómsskjöl eru í vændum, og fleiri fórnarlömb munu líklega stíga fram. Andrés og Sarah eru ekki laus við þetta.“
Að lokum segir hann: „Hann ætti að gera sig aðgengilegan fyrir rannsóknaryfirvöld bæði hér og í Bandaríkjunum. Hann þarf að útskýra hlut sinn, og það þarf Sarah líka. Hún hefur gleymst í umræðunni, en hún tengdist Epstein mikið. Það þarf skýra yfirlýsingu frá henni um nákvæmlega hver tengsl hennar við hann voru.“
Lownie telur jafnvel „sterkar líkur“ á að formleg ákæra verði gefin út á hendur yngri bróður konungsins.
„Ef yfirvöld rannsaka þetta af alvöru, þá eru full rök fyrir því að hefja rannsókn,“ segir hann.
Athugasemdir