Þúsundir manna hafa verið handteknir í tengslum við mótmælin gegn klerkastjórninni í Íran. Einn þeirra er hinn 26 ára Erfan Soltani.
Nú hefur fjölskylda hans verið upplýst um að hann hafi verið dæmdur til dauða, samkvæmt mannréttindasamtökunum Hengaw.
Erfan Soltani var að sögn handtekinn í Fardis-hverfinu, rétt vestan við höfuðborgina Teheran. Nokkrum dögum síðar var hann dæmdur til dauða af því sem kallað er sýndarréttur. Gert er ráð fyrir að aftakan fari fram strax á miðvikudag, að sögn Hengaw.
„Fyrir aftökuna fær fjölskyldan mjög stuttan tíma til að hitta hann,“ skrifa samtökin á X.
Umfangsmiklar aftökur
Mannréttindasamtök hafa gagnrýnt harðlega geðþóttaákvarðanir dómstóla í tengslum við nýlegar óeirðir í Íran.
„Hengaw lýsir yfir djúpum áhyggjum vegna stofnunar hraðréttaraðgerða og umfangsmikilla aftaka fanga sem tengjast nýlegum mótmælum og hvetur almenning til að deila gögnum um slíka skyndidóma og aftökur,“ segir í yfirlýsingu samtakanna.
Hvatt til þátttöku í mótmælum stjórnvalda
Að minnsta kosti 10.000 manns hafa verið handteknir síðan mótmælin hófust og hið minnsta 500 manns hafa látið lífið, samkvæmt Mannréttindafréttastofu aðgerðasinna (Human Rights Activist News Agency).
Í þessari viku var lokað fyrir internet- og símasamband víða í landinu. Á mánudag stendur til að halda mótmælafund til stuðnings stjórnvöldum á Byltingartorgi í Teheran. Í textaskilaboðum sem stjórnvöld hafa sent út segir að almenningur sé hvattur til að taka þátt í því sem lýst er sem stórfelldri samstöðu gegn „skemmdarverkum og vopnuðum hryðjuverkamönnum tengdum Bandaríkjunum og síonistum“.
Jafnframt er fólki ráðlagt að taka ekki þátt í mótmælum almennings.
Mótmæli
Boðað til skyndimótmæla við utanríkisráðuneytið vegna árása á Íran
Leikstjóri verðlaunakvikmyndar neitaði að taka við friðarverðlaunum
Fréttamaðurinn Don Lemon handtekinn vegna mótmæla gegn ICE
Rithöfundar og fræðimenn þrýsta á bresk yfirvöld vegna hungurverkfallsfanga
Ísland tekur ekki þátt í Eurovision 2026
Athugasemdir