Ónafngreindur bílstjóri hefur tilnefnt sjálfan sig sem „fávita“ í umferðinni en það gerði hann með því að birta myndband af eigin akstri í Facebook-hópnum Fávitar í umferðinni.
Myndbandið sýnir ökumanninn ætla að taka fram úr öðrum bíl, sem gefur merki um að öllu sé óhætt, í mjög slæmu skyggni og virðist vera að myndbandið sé tekið á landsbyggðinni. Þegar ökumaðurinn byrjaði að skipta um akgrein til þess að taka fram úr kom hins vegar í ljós að annar bíll var að aka á móti og skapaðist mikil hætta á götunni.
„Feginn að ég náði að bjarga þessu og ekkert alvarlegt gerðist,“ skrifaði ökumaðurinn ónafngreindi og viðurkennir að hann hefði ekki átt að treysta ökumanninum sem gaf merki um að hægt væri að taka fram úr.
Mikið er rifist í hópnum um hver beri sökina en benda margir á að ljósanotkun bíla í myndbandinu sé ekki til fyrirmyndar og að hinn ónafngreindi bílstjóri ætti að vita betur en að taka fram úr í þessari færð þrátt fyrir að bíllinn fyrir framan hafi gefið til kynna að það væri hægt.
„Vó, hvað þetta stóð tæpt ... og í þessari færð. Ég held að jafnvel trúlausir mættu leggjast í þakkarbæn eftir þetta,“ skrifaði Björn Ragnar Björnsson í athugasemd við myndbandið.
Athugasemdir