Fjöldi verkefna kom inn á borð lögreglu á höfuðborgarsvæðinu í nótt og í gærkvöldi, þar sem fjöldi mála tengdist bæði umferðarlagabrotum og ofbeldisbrotum.
Líkamsárás var tilkynnt í verslunarmiðstöð í Reykjavík. Ekki liggja fyrir frekari upplýsingar um meiðsl eða aðdraganda árásarinnar að svo stöddu.
Í miðbænum var ökumaður kærður fyrir svigakstur og ónauðsynlega hljóðmerkjagjöf. Við nánari athugun kom í ljós að viðkomandi var undir áhrifum fíkniefna og var hann í framhaldinu handtekinn. Þá var annar ökumaður stöðvaður í sama hverfi eftir að hafa ekið gegn einstefnu; reyndist hann vera ölvaður og var einnig handtekinn. Að auki var aðili handtekinn í hverfinu fyrir brot gegn lögreglusamþykkt.
Í Reykjavík var ökumaður handtekinn grunaður um ölvunarakstur og annar aðili var handtekinn fyrir vopnalagabrot og hótanir.
Í Garðabæ voru nokkur alvarleg mál til meðferðar. Þar var ökumaður handtekinn fyrir fíkniefna-, ölvunar- og sviptingarakstur. Þá var annar aðili handtekinn grunaður um ölvunar- og fíkniefnaakstur, auk ráns, líkamsárásar og hótana. Sá hafði jafnframt tekið strætisvagn ófrjálsri hendi. Enn fremur var þriðji aðilinn handtekinn fyrir ölvun á almannafæri og fyrir að hlýða ekki fyrirmælum lögreglu, en hann réðst í kjölfarið að lögreglumönnum með ofbeldi og hótunum.
Í Hafnarfirði var ökumaður handtekinn fyrir fíkniefnaakstur.
Tveir ökumenn voru kærðir fyrir akstur sviptir ökurétti, annars vegar í Breiðholti og hins vegar í Árbænum
Eldur kviknaði í bifreið í Árbæ, en slökkvilið náði að ráða niðurlögum eldsins. Bifreiðin var í kjölfarið fjarlægð af vettvangi.
Að lokum barst tilkynning um grunsamlegar mannaferðir í Árbænum, en við nánari athugun reyndist þar vera á ferðinni blaðberi og ekki ástæða til frekari aðgerða.
Athugasemdir