Norskt fiskeldi er að fylla firði og strandsjó með næringarmengun sem jafngildir hráu skólpi frá tugum milljóna manna á hverju ári, samkvæmt nýrri skýrslu að því er fram kemur í frétt Guardian.
Noregur er stærsti framleiðandi eldislax í heimi og næringarefni úr fiskafóðri skila sér beint út í hafið. Greining frá Sunstone Institute sýnir að norskt fiskeldi losaði árið 2025 um 75.000 tonn af köfnunarefni, 13.000 tonn af fosfór og 360.000 tonn af lífrænu kolefni.
Samkvæmt skýrslunni samsvarar þetta magni í óhreinsuðu skólpi frá 17,2 milljónum manna þegar kemur að köfnunarefni, 20 milljónum manna vegna fosfórs og 30 milljónum manna vegna lífræns kolefnis. Þetta hefur vakið áhyggjur af skaðlegum þörungablómum.
„Noregur er lítið land með aðeins 5,5 milljónir íbúa, og mengunin frá fiskeldi miðað við þessi þrjú næringarefni er þrisvar til fimm sinnum meiri en íbúafjöldinn,“ sagði Alexandra Pires Duro, gagnafræðingur hjá Sunstone og höfundur skýrslunnar. „Úrgangurinn – saur, óétið fóður og þvag – fer allt út í vatnið.“
Fiskar í eldi eru haldnir í opnum netkvíum og fóðraðir með næringarríku fóðri. Rannsakendur notuðu gögn frá norsku fiskistofnuninni og dýralæknastofnun til að meta hversu mikið af næringarefnum endar í sjónum.
Niðurstöður sýna að fóðurnotkun jókst um 14,6 prósent á sex árum í takt við vöxt greinarinnar. Mengunin árið 2025 jafngildir því sem mætti búast við í hráu skólpi frá landi á stærð við Ástralíu. Þá kom einnig í ljós að árstíðabreytingar auka vandann, þar sem álagið er mest á sumrin þegar vistkerfi ráða verr við að taka við næringarefnunum.
Úrgangur frá fiskeldi getur aukið vöxt svifþörunga og leitt til skaðlegra þörungablóma sem draga úr súrefni í vatni. Firðir eru sérstaklega viðkvæmir þar sem þeir eru hálf lokaðir og safna því frekar upp næringarefnum. Súrefnismagn í þeim er þegar að minnka vegna hlýnunar jarðar.
Í Sognefjord, lengsta firði Noregs, var aukið innflæði næringarefna talið valda um tveimur þriðju af súrefnisskorti samkvæmt rannsókn frá því í fyrra, en hlýrra vatn skýrði afganginn.
Svipuð þróun hefur átt sér stað í Hardangerfjord, næstlengsta firðinum, samkvæmt yfirvöldum í Vestlandi.
Í mars var níu umsóknum um nýtt fiskeldi í firðinum hafnað vegna aukinnar mengunar sem þær hefðu valdið. Tom Pedersen, umhverfisráðgjafi á svæðinu, sagði niðurstöður skýrslunnar ekki koma á óvart og jafnvel vera „varfærnislega metnar“.
„Helsta áhyggjuefnið er að þörungar og svif lífverur deyja, sökkva til botns og brotna niður – og það ferli notar súrefni,“ sagði hann. „Niðurstaðan er sú að súrefnismagn í firðinum minnkar og hefur minnkað.“
Norska sjávarútvegsráðuneytið vísaði fyrirspurn um málið til Fiskistofu sem neitaði að tjá sig.
Krister Hoaas, fulltrúi Norwegian Seafood Federation, sagði að umfang losunar endurspeglaði magn matvælaframleiðslu í landinu og mikilvægi sjálfsþurftar í neyðarástandi. Hann bætti við að greinin vinni stöðugt að því að draga úr umhverfisáhrifum.
„Mikilvægt er að greina á milli núverandi starfsemi og framtíðarvextar,“ sagði hann. „Hafrannsóknastofnunin hefur bent á að veruleg aukning í sumum fjörðum geti aukið hættu á ofauðgun, en núverandi framleiðsla sé innan burðargetu náttúrunnar. Það bendir til þess að hægt sé að stýra greininni með ströngum, staðbundnum reglum án þess að fullyrða að núverandi starfsemi sé að eyðileggja firðina.“
Athugasemdir