Fyrrverandi þingmaður Pírata, Björn Leví Gunnarsson, segir misskilning og óskýra samskiptahætti skýra þá stöðu sem upp er komin eftir að Sigríður Andersen, þingflokksformaður Miðflokksins, sagðist ekki kannast við að samið hefði verið um lok umræðu á Alþingi um Evrópusambandsmál.
Í ítarlegri færslu fjallar Björn Leví um hvernig slíkur ágreiningur geti orðið til við þinglok og í samskiptum þingflokksformanna. Þar nefnir hann þrjár mögulegar skýringar á stöðunni.
Í fyrsta lagi segir hann að Sigríður Andersen hafi annaðhvort ekki rætt málið nægilega skýrt við eigin þingflokk eða ekki fengið upplýsingar um að samkomulag hefði legið fyrir.
Í öðru lagi segir hann að þingflokksformaður Miðflokksins hafi ekki gert athugasemdir á fundi þingflokksformanna og að forseti Alþingis hafi því túlkað þögnina sem samþykki allra aðila. Björn Leví segir slíkt þó hafa verið algengt hjá Miðflokknum á sínum tíma á Alþingi.
„Þeir sögðu ekkert, þó þeir væru þráspurðir fram og til baka hvaða skoðun þeir hefðu á málunum,“ skrifar hann og bætir við að það hafi verið mistök hjá forseta þingsins að líta á þögn sem samþykki.
Jafnframt gagnrýnir hann Miðflokkinn fyrir að svara ekki skýrt þegar óskað sé eftir afstöðu flokksins og segir það óheiðarlegt að láta hjá líða að hafna samkomulagi með skýrum hætti.
Þá segir Björn Leví að samkomulag hafi í raun legið fyrir við alla aðra flokka en Miðflokkinn og að aðrir þingmenn hafi einfaldlega hætt að eltast við afstöðu flokksins vegna þess hversu erfitt hafi reynst að fá skýr svör.
Hann rifjar einnig upp dæmi frá þinglokum þegar Píratar hafi farið fram á skriflegt samkomulag um þinglok vegna ágreinings um hvað hefði verið samþykkt. „Það tókst að lokum - nema hvað SDG skrifaði undir "samkvæmt samtali, SDG" - og komst þannig frá því að skrifa undir það sem stóð svart á hvítu á blaðinu.“
Að lokum bendir Björn Leví á að Sigríður Andersen sé sjálf þingflokksformaður og beri því sjálf ábyrgð á að vera upplýst um stöðu samninga og samkomulaga.
Athugasemdir