Brynjar Níelsson, borgarfulltrúi og fyrrverandi þingmaður Sjálfstæðisflokksins, gagnrýnir harðlega jafnlaunavottun í færslu sem hann birti á samfélagsmiðlum eftir að Alþingi samþykkti breytingar á kerfinu og lagði niður núverandi fyrirkomulag vottunarinnar.
Í færslunni segist Brynjar hafa ákveðið að „hvíla regnbogafánann í bili“ og draga íslenska fánann að húni í tilefni af breytingunum. Þá rifjar hann upp að hann hafi samþykkt jafnlaunavottun á sínum tíma þrátt fyrir andstöðu sína við hana.
„Ég þurfti að samþykkja hana á sínum tíma með æluna í hálsinum svo það yrðu ekki stjórnarslit á fyrstu mánuðum nýrrar ríkisstjórnar,“ skrifar hann.
Brynjar gagnrýnir jafnframt þá flokka sem studdu vottunina og segir hana hafa verið „heimatilbúna dygðaskreytingu“ sem hafi íþyngt atvinnulífinu. Að hans mati séu slíkar reglur gjarnan tengdar mannréttindum þótt þær hafi neikvæð áhrif á samkeppnishæfni fyrirtækja.
Hann tengir þróunina einnig við Evrópusambandið og segir sambærilegar reglur þar hafa haft neikvæð áhrif á atvinnulíf og hagvöxt. Í færslunni segir Brynjar að Evrópa stefni í að verða „sögulegt minjasafn“ þar sem ferðaþjónusta verði að lokum eina atvinnugreinin sem standi undir sér.
Ný lög um breytingar á jafnlaunakerfinu voru samþykkt á Alþingi nýverið. Með þeim er skyldubundin jafnlaunavottun lögð niður í núverandi mynd og einfaldara fyrirkomulag tekið upp í staðinn. Markmiðið er þó áfram að tryggja jöfn laun fyrir sömu eða jafn verðmæt störf.
Athugasemdir