Glæsilegt einbýlishús á tveimur hæðum í sveitasælu Mosfellsdals hefur verið sett á sölu. Um er að ræða bjálkahús að Helgadalsvegi 8 í Mosfellsbæ sem stendur á eins hektara eignarlóð með fallegu útsýni til allra átta. Ásett verð eignarinnar er 239 milljónir króna.
Húsið var byggt árið 2021.
Eignin hefur verið innréttuð á vandaðan og fallegan hátt og er staðsett á rólegum stað í Mosfellsdalnum þar sem stutt er í fjölbreytta útivist og golf. Þrátt fyrir kyrrðina er aðeins stutt akstur til Reykjavíkur og nærliggjandi þjónustu.
Á neðri hæð hússins eru anddyri, forstofa, rúmgott eldhús, borðstofa, stofa og stórt baðherbergi. Innangengt er yfir í viðbyggingu þar sem finna má aðra forstofu, tvö stór herbergi auk stórs þvottahúss og geymslurýmis í sama opna rými.
Á efri hæð eru tvö svefnherbergi, stórt baðherbergi og björt stofa með útgengi út á stórar suðursvalir.
Samkvæmt upplýsingum í söluyfirliti býður eignin einnig upp á ýmsa framtíðarmöguleika þar sem heimilt er að byggja meira á lóðinni. Þar með gæti eignin hentað bæði sem fjölskylduheimili og fyrir þá sem vilja þróa frekari uppbyggingu á svæðinu.
Eignin er staðsett í fallegu umhverfi þar sem náttúran er í forgrunni og sveitasælan ríkjandi, án þess þó að fórna nálægð við höfuðborgarsvæðið.
Athugasemdir