Ökumaður sem slasaðist alvarlega í umferðarslysi á Hálsasveitarvegi norðan við Reykholt þann 16. júní síðastliðinn er látinn af völdum áverka sinna. Þetta kemur fram í tilkynningu frá lögreglunni á Vesturlandi.
Slysið varð þegar tvær fólksbifreiðar, sem ekið var úr gagnstæðum áttum, rákust saman. Viðbragðsaðilar voru kallaðir á vettvang og voru þrír fluttir á bráðamóttöku til aðhlynningar, þar á meðal ökumenn beggja bifreiðanna og farþegi í annarri þeirra.
Rannsóknardeild lögreglunnar á Vesturlandi fer með rannsókn málsins. Ekki er greint frá aðstæðum sem leiddu til árekstursins né hefur verið upplýst um líðan hinna tveggja sem slösuðust í slysinu.
Athugasemdir