Héraðsdómur Reykjavíkur hefur dæmt Aleksandar Sasa Vrzina í fjögurra mánaða skilorðsbundið fangelsi fyrir líkamsárás á mann fyrir utan City Center Hotel við Austurstræti í febrúar 2025.
Samkvæmt dómnum réðst maðurinn, sem þá starfaði sem næturvörður við hótelið, að brotaþola eftir að sá síðarnefndi hafði rekist utan í rúðu hótelsins. Á upptöku úr öryggismyndavélum sést hvernig ákærði gengur að manninum, grípur harkalega í hálsmál hans og hrindir honum á ljósastaur áður en hann fellir hann í jörðina.
Þá sést Vrzina sparka af afli í brotaþola þar sem hann var að reyna að rísa á fætur. Dómurinn taldi ekki sannað hafið yfir skynsamlegan vafa að sparkið hefði lent í höfði mannsins, eins og ákært var fyrir, en komst að þeirri niðurstöðu að árásin hefði valdið verulegum áverkum.
Brotaþoli hlaut sár á kjálka auk þess sem þrjár tennur brotnuðu. Fyrir dómi kom fram að hann muni þurfa endurteknar tannviðgerðir um ókomin ár vegna afleiðinga árásarinnar.
Dómurinn hafnaði alfarið þeirri málsvörn Vrzina að hann hefði verið að verjast árás. Var talið að brotaþola hefði ekki stafað nein ógn af honum þegar ákærði beitti hann ofbeldi.
Við ákvörðun refsingar var litið til þess að árásin hefði verið tilefnislaus og fólskuleg.
Vrzina var gert að greiða brotaþola samtals 1.200.500 krónur í miska- og skaðabætur auk 700 þúsund króna í málskostnað.
Athugasemdir