Glæsilegt 213 fermetra einbýlishús við Bollagarða 85 á Seltjarnarnesi hefur verið sett á sölu. Húsið, sem var byggt árið 1988, er auglýst á 204,8 milljónir króna og stendur á eftirsóttum og fjölskylduvænum stað í sveitarfélaginu.
Eignin er á tveimur hæðum og er sögð einkennast af vandaðri hönnun, mikilli lofthæð og stórum gluggum sem veita ríkulega náttúrulega birtu inn í rýmið. Húsið hefur fengið gott viðhald í gegnum tíðina og er í mjög góðu ástandi.
Skipulag eignarinnar er vel útfært. Á neðri og efri hæð eru meðal annars forstofa, rúmgott eldhús, stofa og borðstofa, gestasalerni, þvottahús, fjögur svefnherbergi, baðherbergi, sjónvarpsstofa og innbyggður bílskúr.
Fallegur og gróinn garður umlykur húsið og við það er rúmgóð verönd með heitum potti sem skapar góða aðstöðu til útivistar og samveru.
Sérstaða hverfisins felst einnig í sameiginlegu leiksvæði húseigenda við Bollagarða þar sem finna má meðal annars klifurkastala, klifurgrindur, rólur, sandkassa og fleiri leiktæki fyrir börn.
Staðsetning eignarinnar er talin henta fjölskyldum afar vel. Í stuttri fjarlægð eru leikskólar, grunnskóli, sundlaug, golfvöllur, matvöruverslanir og Eiðistorg, sem tryggir greiðan aðgang að helstu þjónustu og afþreyingu. Arkitektar hússins eru Guðni Pálsson og Dagný Helgadóttir.
Athugasemdir