Athafnamaðurinn Kristinn Ka. Nína Sigríðarson, betur þekktur sem Kiddi Kanína, hefur verið dæmdur í sjö mánaða fangelsi í Héraðsdómi Suðurlands fyrir ítrekuð brot gegn umferðarlögum, fíkniefnalögum og vopnalögum. Frestað var fullnustu fjögurra mánaða af refsingunni til tveggja ára gegn almennu skilorði en jafnframt var ævilöng svipting ökuréttar hans áréttuð.
Kiddi játaði skýlaust öll brot sín fyrir dómi. Málið tók annars vegar til aksturs undir áhrifum fíkniefna og sviptur ökurétti í janúar á þessu ári og hins vegar fíkniefna- og vopnalagabrota sem framin voru í mars 2025.
Samkvæmt dómnum var Kiddi stöðvaður við akstur á Suðurlandsvegi í Árborg 4. janúar 2026. Hann var þá sviptur ökurétti og óhæfur til aksturs vegna áhrifa kannabisefna. Í blóðsýni mældist tetrahýdrókannabínól (THC) 6,6 nanógrömm í millilítra.
Við rannsókn lögreglu vegna annars máls fundust samtals rúmlega 51 gramm af maríhúana, einn millílítri af kannabisblönduðum vökva, 15 kannabisplöntur og úðavopn. Fíkniefnin fundust bæði í bifreið Kidda og við húsleit á heimili hans.
Við ákvörðun refsingar leit dómurinn sérstaklega til þess að Kiddi hefði í fjórða sinn verið sakfelldur fyrir akstur undir áhrifum fíkniefna og í annað sinn fyrir akstur sviptur ökurétti. Hann á jafnframt nokkurn sakaferil að baki, meðal annars vegna sambærilegra brota, og hafði áður verið sviptur ökurétti ævilangt.
Dómurinn taldi jafnframt að nýjasta umferðarlagabrotið hefði rofið skilorð eldri dóms. Þrátt fyrir það var litið til þess að Kiddi játaði brotin skýlaust og var það metið honum til málsbóta. Auk fangelsisrefsingarinnar voru fíkniefnin og úðavopnið gerð upptæk og honum gert að greiða rúmlega 380 þúsund krónur í sakarkostnað.
Athugasemdir