Glæsilegt einbýlishús að Þrastanesi 13 í Garðabæ hefur verið sett á sölu fyrir 199,8 milljónir króna. Um er að ræða 277,8 fermetra einbýlishús á þremur pöllum með innbyggðum tvöföldum bílskúr, yfirbyggðri sundlaug og stórri hornlóð með útsýni til sjávar og fjalla.
Húsið var reist árið 1980 og er teiknað af arkitektunum Ferdinand Alfreðssyni og Guðmundi Kr. Kristinssyni. Samkvæmt fasteignasölu einkennist eignin af fjölbreyttu pallaskipulagi, mikilli lofthæð, opnum rýmum og góðri tengingu við útisvæði.
Eignin stendur á 1.220 fermetra eignarlóð sem er gróin og vel hirt. Innkeyrslan er hellulögð og býður upp á stæði fyrir tvær til þrjár bifreiðar auk hins innbyggða 57,1 fermetra tvöfalda bílskúrs.
Á lóðinni stendur jafnframt um 70 fermetra garðskáli og sundlaugarhús sem ekki telst með í skráðum fermetrafjölda hússins. Útisvæðið er hannað með áherslu á skjól og tengingu við náttúruna, auk þess sem yfirbyggða sundlaugin nýtist allt árið um kring.
Samkvæmt sölulýsingu sameinar Þrastanes 13 vandaðan arkitektúr, eftirsótta staðsetningu og útsýni yfir sjó og fjöll. Þá er bent á að eignin bjóði einnig upp á ýmsa framtíðarmöguleika fyrir nýja eigendur.
Athugasemdir