Ný greining mennta- og barnamálaráðuneytisins sýnir alvarlega stöðu í stærðfræðikennslu á Íslandi. Gamalt kjarnaefni, skortur á samfellu á milli skólastiga og mikið álag á kennara kalla á heildstæðar kerfisbreytingar. Stærðfræði verður skilgreind sem forgangsverkefni stjórnvalda til næstu þriggja ára samkvæmt mennta- og barnamálaráðuneytinu.
Helstu niðurstöður greiningarinnar:
- Kennarar búa til sitt eigið efni: Um 76% grunnskólakennara þurfa oft viðbótarefni og 84% nota eigin verkefni reglulega þar sem eldra kjarnaefni dugir ekki til.
- Veik staða nýnema í framhaldsskólum: Enginn framhaldsskólakennari metur stöðu nýnema sem „mjög góða“ og 62% telja hana frekar eða mjög veika.
- Skortur á samstarfi: Aðeins 10% framhaldsskólakennara segja samskipti og samfellu við grunnskóla vera markvissa.
- Ábyrgðin hvílir á kennurum: Greiningin sýnir að kennarar halda kerfinu að verulegu leyti gangandi með eigin undirbúningi og aðlögun á námsefni.
Kerfisvandi frekar en bókaskortur
Upphafleg spurning ráðuneytisins um gæði námsbóka hefur þróast yfir í stærri spurningu um menntakerfið allt. Niðurstaðan sýnir að ekki dugi að kaupa nýjar bækur. Aðalnámskrá, námsmat, námsefni og starfsþróun kennara þurfa að vinna saman sem ein heild. Horft verður til þessara þátta í næstu aðgerðaáætlun menntastefnu fyrir árin 2027–2030.
Lagt til að stærðfræði verði forgangsverkefni
Í greiningunni er lagt til að nýtt kjarnaefni verði valið samkvæmt faglegum gæðaviðmiðum og að innleiðing hefjist á miðstigi grunnskóla. Innleiðingin verður hönnuð með 1. til 10. bekk í huga. Samhliða þarf að tryggja fjármagn í starfsþróun kennara, stöðumat og betri brú á milli skólastiga. Ný stöðu- og framvindupróf Matsferils, sem lögð voru fyrir í vor, munu veita mikilvæg gögn um námsframvindu á landsvísu. Ráðuneytið áréttar þó að mælingar einar og sér dugi ekki, þær þurfi að nýta til markvissra umbóta þar sem þörfin er mest.
Athugasemdir