Blái herinn hóf starfsemi sína árið 1995 þegar Tómas J. Knútsson, sem þá starfaði sem sportköfunarkennari, tók eftir gífurlegu magni af rusli á hafsbotni ásamt nemendum sínum. Samtökin voru formlega stofnuð sem frjáls félagasamtök árið 1998 og hafa síðan þá verið leiðandi í strandhreinsun hér á landi.
Frá upphafi hafa yfir 9.600 sjálfboðaliðar lagt fram meira en 76.000 vinnustundir í rúmlega 300 verkefnum á vegum samtakanna. Afraksturinn er lygilegur, en alls hafa verið fjarlægð yfir 1.550 tonn af rusli úr íslenskri náttúru. Samtökin hafa einnig vakið athygli út fyrir landsteinana og voru tilnefnd til Norrænu umhverfisverðlaunanna árið 2018 fyrir verkefnið Hreinsum Ísland.
Bandarísk fjölskylda frá Atlanta í Georgíu pantaði sérstaka dagsferð í fjöruhreinsun og fræðslu um Reykjanesið á dögunum á vegum umhverfisverndarsamtakanna. Tilgangur ferðarinnar var sérstaklega sá að sonurinn vildi ólmur kynnast því hvernig hann gæti gerst virkur umhverfissinni í sínu heimalandi. Í opinberri færslu lýsa samtökin ferðalögunum sem yndislegu fólki sem sýni hversu langt út fyrir landsteinana starfsemin nær.
„Þessi fjölskylda frá Atlanta, Georgia, USA pantaði eina dagsferð í fjöruhreinsun og fræðsluferð um Reykjanesið. Sonurinn vildi ólmur kynnast því hvernig hann gæti gerst umhverfissinni í sínu heimalandi. Yndislegt fólk.“
Tómas, stofnandi og formaður umhverfisverndarsamtakanna Bláa hersins, var sæmdur riddarakrossi Hinnar íslensku fálkaorðu fyrir framlag sitt á vettvangi umhverfisverndar árið 2019. Heiðursmerkið lýsir hann sem mikilvægri viðurkenning á áratugalangri baráttu gegn plastmengun í hafinu og við strendur Íslands.
Athugasemdir