Kvikmyndaframleiðandinn Grímar Jónsson segir óstöðugleika íslensku krónunnar og háan fjármagnskostnað skapa mikla óvissu við framleiðslu íslenskra kvikmynda. Hann segist ætla að segja já í ágúst í þjóðatkvæðagreiðslunni og vonast til að komandi kynslóðir búi við fyrirsjáanlegri efnahagslegar aðstæður.
Grímar fjallar um málið í aðsendri grein á Vísi. Hann hefur meðal annars framleitt kvikmyndirnar Hrúta, Undir trénu, Héraðið, Northern Comfort og Eldana og sérhæft sig í alþjóðlegri samframleiðslu íslenskra kvikmynda.
Að sögn Gríms hafa verkefni hans kostað á bilinu 200 til 800 milljónir króna og tekur að meðaltali um fimm ár að gera hverja mynd. Hann segir íslenska markaðinn og styrkjakerfið of lítið til að standa eitt undir framleiðslu verkefna af þeirri stærðargráðu.
Grímar segir um 60 prósent kostnaðar kvikmyndanna jafnan fjármögnuð erlendis, meðal annars með stuðningi evrópskra sjóða, sjónvarpsstöðva, dreifingar- og sölufyrirtækja og fjárfesta. Óstöðugleiki krónunnar geti hins vegar leitt til verulegs gjaldeyristaps, jafnvel upp á milljónir.
Þá gagnrýnir hann háan fjármagnskostnað hér á landi. Auðvelt geti verið að fá lán í Evrópu gegn væntanlegum greiðslum í evrum en erlendir lánveitendur vilji ekki lána gegn væntanlegum greiðslum íslenska ríkisins í krónum.
Grímar segir sér þess í stað hafa staðið til boða lán hjá íslenskum viðskiptabanka á 13,5 prósenta vöxtum. Gjaldeyristap og fjármagnskostnaður vegna einnar kvikmyndar geti því numið tugum milljóna króna.
Hann segir stöðuna endurspegla byrðar sem almenningur og fyrirtæki beri vegna krónunnar og telur að hægt sé að skapa stöðugra og fyrirsjáanlegra umhverfi fyrir komandi kynslóðir.
Athugasemdir