Ragnhildur Þórðardóttir, betur þekkt sem Ragga nagli, segir í pistli á Facebook mikilvægt að halda áfram að berjast fyrir sýnileika og réttindum hinsegin fólks þrátt fyrir þær miklu réttarbætur sem náðst hafa á undanförnum árum. Þetta kemur fram í pistli hennar í tilefni Hinsegin daga.
Ragnhildur rifjar meðal annars upp brúðkaup tveggja samkynhneigðra vinkvenna sinna í Fríkirkjunni, skömmu eftir að hjónabönd samkynhneigðra voru lögfest hér á landi. Segir hún athöfnina hafa haft djúpstæð áhrif á sig.
„Að fá tækifæri til að samgleðjast þegar tvær manneskjur sem þú elskar njóta sömu sjálfsagðra réttinda og gagnkynhneigt fólk,“ skrifar Ragnhildur og segir brúðkaupið jafnframt hafa verið táknrænt fyrir samfélagslegt samþykki.
Hún segir réttindabaráttu samkynhneigðra hafa náð langt á tiltölulega skömmum tíma en bendir á að fordómar séu enn til staðar. Nefnir hún meðal annars skemmdarverk á regnbogafánum, niðrandi orðræðu í garð samkynhneigðra og fordóma gagnvart trans fólki. „Enn þann dag í dag eru unnin skemmdarverk á regnbogafána af illa innrættum sálum í húmi nætur,“ skrifar Ragnhildur.
Af þeim sökum telur Ragnhildur enn ríka þörf fyrir Gleðigönguna. Hún segir gönguna ekki eingöngu snúast um hátíðarhöld heldur einnig sýnileika, fræðslu og að sýna fram á fjölbreytileika samfélagsins.
„Við erum ekki aðeins að fagna þeim réttindum sem hafa áunnist. Heldur til að auka sýnileika hinsegin fólks,“ skrifar hún.
Ragnhildur segir fjölskyldur og sambönd geta verið af ýmsum toga og að samfélagið væri mun fátæklegra ef allir væru eins. Hún hvetur jafnframt til þess að fordómum og skemmdarverkum verði svarað með enn meiri sýnileika.
„Þegar krumpaðar táslur fara á stjá með illvirki í huga þá svörum við með að hengja upp fleiri fána, málum þá stærri og skrúfum allt í botn í Gleðigöngunni.“
Athugasemdir