Verðbólga á Íslandi mælist núna 5,6 prósent, samkvæmt nýjum tölum Hagstofunnar í morgun. Það þýðir að verðlag er þeim mun hærra en fyrir ári og að höfuðstóll verðtryggðra fasteignalána, sem er algengasta form lána, hefur hækkað um sama hlutfall á einu ári.
Samkvæmt tölum Hagstofunnar hækkaði vísitala neysluverðs um 0,2% í ágúst. Í ágúst í fyrra lækkaði hins vegar vísitalan um 0,15%.
Verðbólgan á Íslandi er töluvert meiri en í helstu samanburðarlöndum. Hún var að meðaltali 2,9% í Evrópusambandinu í júlí, en 3% í Noregi.
Verðbólgutölurnar sem birtar voru í morgun staðfesta að forsendubrestur hefur orðið í kjarasamningum, þar sem viðmiðið var að verðbólga yrði ekki yfir 4,7%. Landsbankinn hafði spáð 5,5% verðbólgu, en Íslandsbanki spáði 5,6%, en þó aðeins 0,15% hækkun vísitölunnar.
Lántakendur sem eru með verðtryggð lán munu sjá lán sín hækka um 0,2%, að frádregnum afborgunum, í októbermánuði.
Ákvörðun um hækkun skráningargjalda í opinbera háskóla er stór hluti ástæðunnar fyrir hækkuninni, en þau fóru úr 75 þúsund krónum í 100 þúsund krónur og höfðu ekki hækkað síðustu 12 ár á undan.
Hér má sjá hvað hefur hækkað mest síðastliðið ár.
Athugasemdir