Þriggja herbergja íbúð við Kelduland 5 í Fossvogi hefur verið sett á sölu fyrir 81,9 milljónir króna. Íbúðin er í fjölbýlishúsi sem reist var árið 1971 og hefur eignin verið endurnýjuð að verulegu leyti á undanförnum árum.
Það eru þau Eva Karen Ástudóttir flugfreyja og Róbert Freyr Pálsson, landsliðsmaður í íshokkí, sem eru að selja íbúðina.
Íbúðin skiptist meðal annars í forstofu, stofu og borðstofu í opnu rými, eldhús, tvö svefnherbergi og baðherbergi. Úr stofunni er gengið út á stórar suðursvalir.
Eldhúsið hefur nýlega verið endurnýjað og þar eru innréttingar frá HTH með steinborðplötum. Þá eru þar innfelld heimilistæki, búrskápur og vínkælir í eyju. Hjónaherbergið er með góðu skápaplássi auk þess sem fataskápar á gangi veita aukið geymslurými.
Baðherbergið hefur einnig verið endurnýjað og er flísalagt í hólf og gólf. Þar er sturta með glerskilrúmi og innfelldum blöndunartækjum auk aðstöðu fyrir þvottavél og þurrkara.
Ný gólfefni hafa verið lögð í íbúðinni og allir ofnar endurnýjaðir. Eigninni fylgir jafnframt 4,3 fermetra geymsla í kjallara.
Húsið sjálft hefur einnig fengið töluvert viðhald. Það var múrviðgert og málað árið 2024 og flestir gluggar í íbúðinni endurnýjaðir ásamt svalahurð. Þakið var málað árið 2022 og vesturgafl hússins klæddur árið 2021.
Athugasemdir