Guðmundur Ingi Kristinsson, fyrrverandi þingflokksformaður og varaformaður Flokks fólksins, ræddi í viðtali á Morgunvaktinni á Rás 1 í morgun um úrsögn sína úr flokknum um miðjan apríl.
Guðmundur Ingi var einn stofnenda Flokks fólksins og gegndi embætti mennta- og barnamálaráðherra frá mars 2025 þar til hann sagði af sér vegna heilsufars í janúar. Hann fór í veikindaleyfi fyrir síðustu jól en þá ákvað Inga Sæland, formaður flokksins, að endurskipuleggja ráðherralið hans: hún tók sjálf við ráðuneyti Guðmundar Inga en Ragnar Þór Ingólfsson kom nýr inn í ríkisstjórn og tók við félags- og húsnæðismálaráðuneytinu.
Í viðtalinu sagði Guðmundur Ingi að röð atvika hefði leitt til úrsagnar hans, og að það tengdist ekki því að hann var settur út úr ráðherraembætti, heldur aðferðinni sem beitt var. „Pólitíkin er tík,“ sagði hann meðal annars. Hann sagðist ekki tilbúinn að fara nánar út í málið að svo stöddu, en gaf í skyn að atburðir hefðu snert fjölskyldu hans með óviðunandi hætti. Hann kvaðst ætla að gera hreint fyrir sínum dyrum fljótlega svo sannleikurinn kæmi fram í stað sögusagna.
Guðmundur Ingi situr nú utan flokka á þingi og styður ríkisstjórnina.
Athugasemdir