Farþegar almenningsvagna í Singapúr geta átt yfir höfði sér háar sektir fyrir ýmiss konar óæskilega hegðun, þar á meðal að borða um borð eða leggja fæturna á sæti. Nýjar reglur þess efnis voru kynntar af samgönguyfirvöldum landsins á mánudag.
Samkvæmt reglunum getur sekt fyrir að leggja fæturna á sæti numið allt að 400 Bandaríkjadölum en það er tæplega 50 þúsund íslenskar krónmur. Mun þyngri viðurlög geta fylgt því að óhreinka strætisvagn eða skapa hættu fyrir aðra farþega, en fyrir slík brot getur sektin farið allt upp í 3.900 Bandaríkjadali, sem jafngildir 475 þúsund í íslenskum krónum.
Í leiðbeiningum yfirvalda kemur fram að alvarleg óhreinkun geti meðal annars falist í því að æla, kasta af sér vatni eða hrækja í vagninum. Einnig getur það fallið undir reglurnar að óhreinka sæti, gólf eða handrið með líkamsvökvum, mat, leðju eða fitu.
Singapúr er þekkt fyrir strangar reglur um hegðun og umgengni á almannafæri og hefur fyrir vikið fengið viðurnefnið „Fine City“. Það vísar bæði til þess hversu snyrtileg borgin þykir og þess mikla fjölda sekta sem hægt er að fá fyrir ýmis brot.
Nýju reglurnar færa reglur í strætisvögnum nær þeim sem þegar gilda í neðanjarðarlestakerfi Singapúr. Að sögn samgönguyfirvalda er markmiðið að skapa öruggara, tillitssamara og þægilegra umhverfi í almenningssamgöngum.
Yfirvöld taka þó fram að gæta eigi sanngirni við framkvæmd reglnanna. Sérstakt tillit verði tekið til aðstæðna farþega sem glíma við líkamleg eða andleg veikindi.
Singapúr hefur lengi beitt ströngum reglum til að halda almenningsrýmum hreinum. Þekkt dæmi er bann við sölu tyggigúmmís sem tók gildi árið 1992.
Athugasemdir