Umboðsmaður Alþingis hefur gert athugasemdir við meðferð lögreglustjórans á höfuðborgarsvæðinu og ríkissaksóknara á máli tveggja einstaklinga sem kvörtuðu vegna eignaspjalla sem þau töldu sig hafa orðið fyrir.
Lögreglustjórinn hafði ákveðið að hætta rannsókn málsins og staðfesti ríkissaksóknari þá ákvörðun. Umboðsmaður komst hins vegar að þeirri niðurstöðu að ýmsir annmarkar hefðu verið á málsmeðferð stjórnvaldanna.
Í áliti umboðsmanns kemur meðal annars fram að lögregla hafi ekki sinnt leiðbeiningarskyldu sinni með fullnægjandi hætti. Ekki hafi verið leiðréttur grundvallarmisskilningur sem gætti hjá einstaklingunum við skýrslutöku og leiðbeiningarbréf sem þeim var afhent hafi getað verið villandi.
Þá taldi umboðsmaður að málið hefði ekki verið nægilega upplýst áður en rannsókn þess var hætt. Einstaklingunum hefði ekki gefist kostur á að koma afstöðu sinni á framfæri áður en tímamörk, sem lögreglan hafði sjálf tilgreint, runnu út.
Einnig voru gerðar athugasemdir við málsmeðferð ríkissaksóknara. Embættinu hefði borið að rannsaka betur í hvaða farveg einstaklingarnir vildu leggja málið og leiðbeina þeim um hvernig krafa um málshöfðun þyrfti að vera úr garði gerð til að uppfylla skilyrði laga.
Umboðsmaður lagði jafnframt áherslu á mikilvægi málshraða þegar brotaþolum er settur frestur til að gera kröfu um málshöfðun. Tryggja þurfi að tafir leiði ekki til réttarspjalla, líkt og varð í þessu máli þegar frestur rann út.
Umboðsmaður lauk málinu með áliti 17. júlí 2026. Álitið var síðan birt á vef umboðsmanns föstudaginn 25. september.
Athugasemdir