Félagsfundur Sósíalistaflokks Íslands samþykkti um helgina ályktun þar sem flokkurinn lýsir yfir algerri andstöðu við hvers kyns skerðingu á verkfallsrétti launafólks.
Í ályktuninni er bæði vísað til lögbanns ríkisstjórnarinnar á verkföll og hugmynda sem nú eru til umræðu innan Sjálfstæðisflokksins um að veita ríkissáttasemjara heimild til að fresta verkföllum stéttarfélaga.
Sósíalistar segja verkfallsréttinn vera sögulegan ávinning verkafólks og mikilvægt tæki til að berjast fyrir bættum kjörum.
„Verkfallsrétturinn er ekki réttur sem má skerða, takmarka, fresta eða banna að vild,“ segir í ályktuninni.
Þar segir jafnframt að hugmyndir um að skerða verkfallsréttinn geti fælt fólk frá því að berjast fyrir bættum kjörum á tímum efnahagslegrar óvissu.
Flokkurinn gagnrýnir einnig efnahagsstefnu stjórnvalda og Seðlabanka Íslands og segir stýrivaxtastefnu Seðlabankans, hækkanir á opinberum gjaldskrám og verðhækkanir fyrirtækja hafa stuðlað að aukinni verðbólgu.
Langvarandi aðgerðaleysi í húsnæðismálum sé jafnframt ein af meginástæðum þeirrar verðbólgu og lífskjarakrísu sem bitni hvað harðast á launafólki, að mati flokksins.
Í ályktuninni segir að veikingu verkalýðshreyfingarinnar verði ekki beitt sem lausn á efnahagsvandanum.
„Að grafa undan verkfallsréttinum og að veikja verkalýðshreyfinguna er ekki lausn á þeim djúpstæðu efnahagslegu vandamálum og kemur ekki til greina,“ segir þar.
Sósíalistaflokkurinn hafnar jafnframt því að ábyrgð á þróun efnahagsmála verði lögð á herðar launafólks og kallar þess í stað eftir aðgerðum gegn því sem flokkurinn telur vera rót vandans.
„Þess í stað þarf að grípa til aðgerða gegn rót vandans: Verðbólguskapandi hegðun stórfjármagnseigenda, Seðlabankans og yfirvalda,“ segir í ályktuninni.
Athugasemdir