Björn Birgisson, samfélagsrýnir og fyrrverandi ritstjóri frá Grindavík, sparar ekki stóru orðin í nýrri Facebook-færslu þar sem hann gagnrýnir stjórnarandstöðuna harðlega en færslur hans vekja að jafnaði mikla eftirtekt og umræðu. Í nýju færslunni sakar Björn fyrri ríkisstjórn um að hafa skilið eftir gríðarlegar skuldir og segir núverandi stjórnvöld þurfa að taka til eftir hana.
Björn beinir spjótum sínum einkum að Sjálfstæðisflokknum, en hann gagnrýnir einnig Vinstri græn, Framsóknarflokkinn og Miðflokkinn.
„Aðallega Sjallarnir sem aldrei á að hleypa að opinberu fjármagni eða stjórnun af nokkru tagi,“ skrifar Björn og segir Vinstri græn vera á líknardeildinni. Þá líkir hann stöðu Framsóknarflokksins við einhvers konar lömunarveiki og segir Miðflokkinn ekkert kunna annað en að rífa kjaft.
Mest fer fyrir gagnrýni Björns á fjármál ríkisins og þann halla sem hann segir fyrri ríkisstjórn hafa skilið eftir.
„Við síðustu stjórnarskipti stóð halli fjárlaganna í 805 milljörðum. Slíkur halli er skuld fyrir framtíðina að greiða,“ skrifar hann.
Til að undirstrika gagnrýni sína tekur Björn dæmi af smærri fyrirtækjum og segir að ef verslun eða pylsuvagn safnaði hlutfallslega sambærilegum skuldum á sjö árum yrðu eigendur þeirra gjaldþrota og jafnvel dæmdir til fangelsisvistar.
Hann segir núverandi ríkisstjórn þurfa að takast á við afleiðingar fjármálastjórnar fyrri ríkisstjórnar og líkir stöðunni við það sem gerðist í kjölfar efnahagshrunsins árið 2008.
„Ríkisstjórnin hamast við að moka flórinn eftir þessa sóða, en þeir standa á hliðarlínunni hrópandi ókvæðisorð,“ skrifar Björn.
Hann gagnrýnir jafnframt þá hugmynd að stjórnarandstaðan taki aftur við stjórnartaumunum og segir að þeir sem hafi skapað vandann séu nú meðal þeirra sem gagnrýni hvernig tekið sé á honum.
Í lok færslunnar vísar Björn til myndar sem fylgir henni og á að sýna Ísland með fjárlagagatinu. Hann beinir spurningu að þeim sem hann telur bera ábyrgð á hallanum og veltir fyrir sér hvort þeir ætli að greiða skuldirnar með skattalækkunum.
„Ætla þeir sem grófu holuna að borga þessa skuld með lækkun skatta í landi tækifæranna í útgerðinni?“ spyr Björn að lokum.
Athugasemdir