Salma Björk Önnudóttir var kjörin nýr formaður ungliðahreyfingar Miðflokksins á aukaaðalfundi hreyfingarinnar í Hamraborg. Hún tekur við formennsku af Antoni Sveini McKee, sem gegnt hefur embættinu síðustu tvö ár.
Jón Hjörtur Kröyer var kjörinn varaformaður en auk hans voru fimm aðrir kjörnir í stjórn.
Á fundinum samþykktu ungir Miðflokksmenn umfangsmikla ályktun um meðal annars fjölskyldu-, skóla-, hinsegin- og útlendingamál auk stöðu íslenskrar tungu.
Í skólamálum gagnrýnir hreyfingin skóla án aðgreiningar og vill styrkja stöðu sérskóla og sérdeilda. Þá er aðalnámskrá frá árinu 2011 gagnrýnd og lagt til að aukin áhersla verði lögð á lestur, réttritun og reikning.
Hreyfingin hafnar jafnframt því að utanaðkomandi samtök séu fengin „til að kenna börnum tískuhugmyndir um kyn og kynlíf“ en væntanlega er verið að vísa í Samtökin 78 í þeim efnum. Kynfræðsla eigi þess í stað að vera í höndum kennara og foreldra. Rétt er þó að taka fram að Samtökin 78 sjá ekki um kynfræðslukennslu í skólum heldur er slíkt í höndum kennara. Þá leggst hreyfingin gegn kynþroskabælandi meðferðum og krosshormónameðferðum fyrir börn undir 18 ára aldri.
Í útlendingamálum vill hreyfingin draga verulega úr móttöku flóttafólks og leggja meiri áherslu á aðstoð í heimahögum. Einnig verði gerðar strangari kröfur til ríkisborgararéttar og aðlögunar að íslensku samfélagi. Þá styður hreyfingin bann við tilteknum íslömskum klæðaburði og hafnar tilslökunum vegna halal- og kosher-slátrunar.
Að lokum er lögð rík áhersla á íslenska tungu. Hreyfingin vill að stjórnsýsla, þjónusta og auglýsingar séu á íslensku og að fólk greiði almennt sjálft fyrir túlkaþjónustu eftir meira en tólf mánaða dvöl hér á landi.
Athugasemdir