Íbúi í Norðlingaholti segir óþekktan einstakling hafa brotið rúðu í útidyrahurð heimilis síns á miðvikudagskvöld og síðan hlaupið á brott. Atvikið hefur verið tilkynnt til lögreglu.
Hilmar Guðmannsson greinir frá atvikinu í Facebook-hópi fyrir íbúa Norðlingaholts og birti jafnframt ljósmyndir af skemmdunum.
„Kl 19:20 heyrðist ógurlegur hávaði úr forstofunni. Einhver braut rúðuna í útidyrahurðinni okkar og hljóp í burtu,“ skrifar Hilmar.
Hann segir engan stein hafa fundist við hurðina og telur því að áhald hafi verið notað til að brjóta rúðuna.
„Það var enginn steinn fyrir innan eða utan hurðina svo þetta var gert með einhverju áhaldi sem viðkomandi tók síðan með sér á flóttanum,“ segir hann og biðlar til nágranna um upplýsingar.
„Ef þið heyrið eitthvað eða vitið eitthvað hver er að gera svona lagað endilega talið við viðkomandi. Þessum aðila líður illa.“
Fjölmargir íbúar brugðust við færslunni og nokkrir lýstu sambærilegum atvikum. Einn þeirra sagðist hafa orðið fyrir ítrekuðu ónæði, meðal annars eggjakasti í bíla og spörkum í útidyr, og annar íbúi lýsti því að nýlega hefði verið „hamast á húninum og sparkað í hurðina“.
Athygli vekur ummæli Kolla Þrastarsonar undir færslunni. Hann skrifar:
„Bara það sem koma skal. Með nýjum menningum koma nýjir siðir.“
Ekki liggur fyrir hvað Kolli á nákvæmlega við með orðunum eða hvort hann búi yfir einhverjum upplýsingum um hver hafi staðið að skemmdarverkinu sem ekki koma fram í umræðunni. Engar upplýsingar í færslunni sjálfri gefa til kynna hver gerandinn var eða bakgrunn hans.
Fleiri íbúar velta því upp að um einhvers konar dyraat eða samfélagsmiðlaáskorun meðal ungmenna geti verið að ræða. Þórhildur Þórhallsdóttir skrifar til að mynda: „Þetta er eitthvað krakka tiktok trend.“
Guðrún Tinna Valdimarsdóttir segist jafnframt þekkja til sambærilegs atviks á Vatnsenda í fyrra þar sem ungir strákar hafi barið og sparkað í hurð þar til rúða brotnaði.
Málið er nú komið á borð lögreglu að sögn Hilmars.
Athugasemdir