Arna Lára Jónsdóttir, þingmaður Samfylkingarinnar, kallaði eftir óháðri úttekt á meðferð kynferðis- og kynbundinna ofbeldismála í ræðu sinni undir liðnum störf þingsins á Alþingi í dag. Vísaði hún þar meðal annars til nýlegs dóms Landsréttar sem hefur vakið mikla umræðu.
Arna Lára sagði dóminn, sem féll 15. október, hafa vakið óhug og reiði í samfélaginu. Í málinu var maður sýknaður af nauðgun en hafði áður verið dæmdur í fimm ára fangelsi í héraðsdómi.
Hún rakti þá áverka sem konan í málinu hefði hlotið og nefndi meðal annars rifbeinsbrot, heyrnartap, áverka á höfði og tognanir. Konan væri enn óvinnufær þremur árum síðar.
„Samþykki fyrir kynlífi er ekki samþykki fyrir ofbeldi,“ sagði Arna Lára.
Hún vakti jafnframt athygli á undirskriftalista þar sem kallað er eftir því að Alþingi og dómsmálaráðherra beiti sér fyrir óháðri úttekt á meðferð kynferðis- og kynbundinna ofbeldismála, allt frá rannsókn til dómsmeðferðar. Rúmlega fjögur þúsund einstaklingar hafa skrifað undir.
Sagði hún mikilvægt að úttektin næði meðal annars til sönnunarmats, læknisfræðilegra gagna og frásagna þolenda. Þá þyrfti að skoða sérstaklega hvernig samþykki, mörk þess, afturköllun og ásetningur væru metin.
Arna Lára sagði ábyrgðina ekki mega færast yfir á þolendur og að þeir ættu ekki að þurfa að réttlæta hvers vegna þeir hefðu ekki sagt nei oftar eða barist meira á móti.
Hún sagði samfélagið þurfa að horfast í augu við ofbeldi gegn konum og börnum og lauk máli sínu með þungum orðum.
„Hættulegasti staður kvenna er heimili þeirra. Nú er mál að linni.“
Athugasemdir