Héraðsdómur Vesturlands dæmdi í fyrradag karlmann í þriggja og hálfs árs fangelsi fyrir stórfellt brot í nánu sambandi og alvarlega líkamsárás gegn sambýliskonu sinni. Maðurinn hafði verið ákærður fyrir tilraun til manndráps en var sýknaður af þeim hluta ákærunnar.
Árásin átti sér stað á heimili parsins. Samkvæmt framburði konunnar sparkaði maðurinn upp hurð að svefnherbergi þar sem hún hafði læst sig inni. Hann réðst síðan á hana í rúminu, sló hana ítrekað í andlitið, reif í hár hennar, hélt fyrir munn hennar og nef og tók hana kyrkingartaki.
Nágranni kallaði til lögreglu eftir að hafa heyrt öskur og ógnandi karlmannsrödd. Þegar lögreglumenn komu á vettvang var konan í miklu uppnámi og með sjáanlega áverka. Blóðslettur fundust í svefnherberginu auk hárlokks og eyrnalokks konunnar.
Maðurinn neitaði sök og hélt því fram að konan hefði ráðist á sig. Dómurinn taldi framburð hans hins vegar ótrúverðugan en frásögn konunnar studda læknisfræðilegum gögnum og öðrum gögnum málsins.
Áverkar á hálsi konunnar bentu til þess að verulegur kraftur hefði verið notaður við kyrkinguna. Réttarlæknir sagði slíkt kyrkingartak geta skapað lífshættulegt ástand.
Ekki var þó talið fullsannað að maðurinn hefði haft ásetning til að bana konunni og var hann því ekki sakfelldur fyrir tilraun til manndráps.
Við ákvörðun refsingar var meðal annars horft til þess að maðurinn hafði áður verið dæmdur fyrir ofbeldi gegn sömu konu. Dómurinn lýsti árásinni sem hrottalegri.
Manninum var einnig gert að greiða konunni 1,2 milljónir króna í miskabætur og rúmar 4,1 milljón króna í sakarkostnað.
Athugasemdir