Það var stútfullt í öllum sölum Bíó Paradísar þegar heimildarmyndin NAZA var sýnd þar í gærkvöldi í samstarfi við Courage International. Kristinn Hrafnsson, ritstjóri WikiLeaks, segir myndina varpa ljósi á aðferðir ísraelska hersins á Gaza og hvetur íslensk stjórnvöld til að grípa til harðra aðgerða gegn Ísrael.
Í færslu á Facebook segir Kristinn myndina ekki auðvelda áhorfs, enda fjalli hún um „þjóðarmorð, slátrun barna og mannlega grimmd“. Hann segir áhorfið hafa vakið hugrenningar um „lágkúru illskunnar“, með vísan til heimspekingsins Hönnu Arendt.
Kristinn segir kjarnann í myndinni vera viðtöl við ísraelska hermenn og vekur sérstaka athygli á því hversu margir þeirra hafi starfað í tölvu- og njósnadeild ísraelska hersins, Unit 8200.
„Þar eru kaldrifjuðustu morðingjarnir, unga fólkið sem situr í þægindum fyrir framan tölvuskjái í Tel-Aviv og velur, með aðstoð vitlíkis (AI), skotmörkin þar sem slátra skal fólki,“ skrifar Kristinn.
Hann segir að við val á skotmörkum séu notuð „vandlega úthugsuð kerfi um hvernig drepa má sem flesta með reikniformúlur og hugbúnað að vopni“.
Kristinn nefnir sérstaklega hugbúnað sem beri heitið „Hvar er pabbi?“ (Where’s Daddy?). Hann segir kerfið meðal annars nýta upplýsingar úr símum eiginkvenna og barna þess sem skilgreindur sé sem skotmark.
„Það er beinlínis stefna að sprengja heimkynni manna þegar þeir eru í faðmi fjölskyldunnar, helst þegar allir eru sofandi eða að borða saman kvöldmat. Öllum er slátrað,“ skrifar Kristinn og segir vitnisburðinn í myndinni sýna að allir íbúar Gaza séu taldir réttdræpir.
Hann segir myndina ganga gegn fullyrðingum Ísraels um að her landsins reyni sérstaklega að hlífa óbreyttum borgurum.
Vill viðskiptabann, ferðabann og stjórnmálaslit
Kristinn fjallar einnig um muninn á Hamas sem stjórnmálasamtökum og vopnuðum armi samtakanna, al-Qassam-sveitunum. Hann líkir sambandinu við tengsl Sinn Féin og Írska lýðveldishersins (IRA) á Norður-Írlandi og bendir á að einstaklingar sem Ísraelar skilgreini sem liðsmenn Hamas geti einnig verið borgaralegir starfsmenn á Gaza.
Í umræðum eftir sýninguna hafi fólk meðal annars spurt hvað hægt væri að gera. Kristinn segir svar sitt vera að þrýsta á íslensk stjórnvöld um að grípa til aðgerða gagnvart Ísrael.
Hann leggur til þrjú skref:
- „Banna öll viðskipti við Ísrael.“
- „Banna Ísraelum að ferðast til Íslands.“
- „Slíta stjórnmálatengsl við Ísrael.“
Kristinn segir að aðgerðirnar séu ekki róttækar og eigi sér sögulegar hliðstæður. Hann telur þær þvert á móti hófleg viðbrögð miðað við alvarleika málsins.
„Raunar eru þetta sjálfsögð og fremur hófleg skref, miðað við alvöru málsins og eiginlega eðlilegra að spyrja: „Eftir hverju er beðið?““ skrifar Kristinn.
Athugasemdir