Fimm ökumenn voru stöðvaðir í umferðareftirliti lögreglunnar á höfuðborgarsvæðinu á dagvaktinni í dag. Grunur leikur á að þeir hafi ekið undir áhrifum vímuefna og reyndust nokkrir þeirra jafnframt vera án ökuréttinda.
Þetta kemur fram í dagbók lögreglunnar fyrir tímabilið frá klukkan fimm í morgun til 17 í dag.
Lögreglan sem starfar í Austurbæ, miðbæ og Vesturbæ Reykjavíkur stöðvaði tvo ökumenn vegna gruns um akstur undir áhrifum vímuefna. Annar þeirra var einnig grunaður um að aka án ökuréttinda.
Á athafnasvæði lögregunnar sem starfar í Hafnarfirði, Garðabæ og á Álftanesi voru fjórir ökumenn stöðvaðir. Þrír þeirra höfðu verið sviptir ökuréttindum og einn var með ætluð fíkniefni í fórum sínum.
Í Kópavogi og Breiðholti var einn ökumaður stöðvaður, grunaður um akstur undir áhrifum vímuefna og vörslu ætlaðra fíkniefna.
Hundur glefsaði í vegfaranda
Lögreglu barst tilkynning um hund sem hafði glefsað í vegfaranda fyrir framan matvöruverslun í umdæmi lögreglustöðvarinnar í Hafnarfirði, Garðabæ og á Álftanesi. Vegfarandinn slapp ómeiddur en buxur hans rifnuðu í atvikinu.
Á svæði lögreglustöðvarinnar í Grafarvogi, Mosfellsbæ og Árbæ var tilkynnt um þjófnað úr matvöruverslun. Einnig var tilkynnt um minniháttar árekstur tveggja bifreiða þar sem ökumaður sem talinn er hafa valdið tjóninu yfirgaf vettvang.
Þegar dagbókin var tekin saman klukkan 17 voru tveir einstaklingar vistaðir í fangageymslu lögreglu. Lögreglan sinnti jafnframt almennu eftirliti og ýmsum aðstoðarbeiðnum á tímabilinu.
Athugasemdir