Alexandra Jóhannesdóttir, bæjarstjóri Suðurnesjabæjar, segir fyrstu 75 dagana í starfi hafa verið viðburðaríka og að mörgu leyti öðruvísi en hún hafði gert ráð fyrir. Í færslu á Facebook segir hún að slit meirihlutasamstarfsins í bæjarstjórn hafi verið ákveðin eldskírn, en reynslan hafi ekki dregið úr henni kjarkinn.
Alexandra segir skiljanlegt að breytingar á meirihlutasamstarfi veki spurningar og áhyggjur meðal íbúa, starfsfólks og annarra sem eiga samskipti við sveitarfélagið. Hún leggur þó áherslu á að pólitískar breytingar breyti ekki þeirri ábyrgð bæjarstjóra að tryggja faglega stjórnsýslu, góða þjónustu og eðlilega framvindu verkefna.
Nýr meirihluti hefur nú tekið við og segist Alexandra hlakka til samstarfs við hann og bæjarstjórn alla. Hún telur mikilvægt að skapa grundvöll fyrir málefnalega umræðu, gagnkvæmt traust og farsæla ákvarðanatöku, þrátt fyrir ólíkar skoðanir á áherslum og leiðum.
„Þegar upp er staðið hljótum við öll að stefna að sama marki, sem er að efla Suðurnesjabæ og bæta lífsgæði þeirra sem hér búa,“ skrifar hún.
Á fyrstu vikum sínum í starfi hefur Alexandra kynnst starfsfólki, íbúum og fjölbreyttri starfsemi sveitarfélagsins. Hún segir reynsluna hafa styrkt trú sína á möguleikum bæjarins, þar sem öflugt samfélag, fjölbreytt atvinnulíf og dýrmætur mannauður séu til staðar.
Hún bendir jafnframt á að áskoranirnar séu margar og að áframhaldandi uppbygging kalli á skýra framtíðarsýn og gott samstarf.
Þrátt fyrir erfiða byrjun segist Alexandra vera bjartsýn á framhaldið og telur að sameiginlegt átak geti skilað miklu fyrir Suðurnesjabæ.
„Þó að þessar fyrstu vikur hafi verið ákveðin eldskírn hafa þær ekki dregið úr mér kjarkinn, þvert á móti. Þessi reynsla hefur aukið metnað minn og bjartsýni fyrir hönd Suðurnesjabæjar og styrkt trú mína á því sem við getum áorkað með sameiginlegu átaki á þessu mesta vaxtarsvæði landsins,“ skrifar hún og bætir við:
„Fram undan er mikil vinna, en hér er líka sterkur vilji til að gera gott samfélag enn betra“.
Athugasemdir