Kristinn Hrafnsson, ritstjóri WikiLeaks, fagnar árangri Luiz Inácio Lula da Silva, forseta Brasilíu, og segir mikilvægt að hann haldi velli á tímum þegar öfgahægrinu vex ásmegin víða í Rómönsku Ameríku.
Í færslu á Facebook segir Kristinn að hann fari að jafnaði varlega í að hrósa stjórnmálamönnum, enda þurfi blaðamenn einnig að gagnrýna þá þegar þeir fari út af sporinu. Lula sé þó einn fárra stjórnmálamanna sem virki einlægir í ásetningi sínum til að vinna almenningi gagn.
Kristinn segir forsetann einnig gefa til kynna að honum sé raunverulega umhugað um fólk og nefnir sérstaklega hlýlegt viðmót hans og þétt handtak.
Lula studdi baráttu Assange
Kristinn rifjar upp fyrsta fund sinn með Lula fyrir fjórum árum, eftir að forsetinn hafði sigrað Jair Bolsonaro í kosningum. Að sögn Kristins náði hann þá að ræða við Lula í um klukkustund, þrátt fyrir mikla spennu í höfuðborginni. Hann segir stuðningsmenn Bolsonaro og forsetann sjálfan hafa verið að undirbúa valdarán skömmu síðar.
Á fundinum hét Lula Kristni fullum stuðningi í baráttunni fyrir frelsi Julian Assange og segir Kristinn forsetann hafa staðið við það loforð.
Lula talaði máli Assange á ýmsum vettvangi, meðal annars í opnunarræðu sinni á allsherjarþingi Sameinuðu þjóðanna og í opinberri heimsókn til Bretlands meðan Assange sat í fangelsi þar í landi.
Kristinn segir Lula einnig hafa beitt sér í samskiptum sínum við Frans páfa, sem tók á móti Stellu Assange, eiginkonu Julians, og sonum þeirra.
Seinni fundur Kristins og Lula fór fram í Róm helgina sem Frans páfi var borinn til grafar. Þá tókst að skipuleggja fund milli Assange og brasilíska forsetans með skömmum fyrirvara, svo Assange gæti þakkað honum persónulega fyrir mikilvægan stuðning.
Fundurinn fór fram daginn áður en þeir Lula og Assange héldu til að kveðja páfann í hinsta sinn.
Óttaðist sigur öfgahægrisins
Kristinn segist hafa verið svartsýnn fyrir seinni umferð kosninganna í Brasilíu. Hann hafi talið miklar líkur á því að landið yrði næsta ríki í Rómönsku Ameríku til að færast í átt að öfgahægrinu.
Hann telur að utanaðkomandi öfl hafi átt þátt í að greiða þeirri þróun leið.
„Ég var mjög svartsýnn fyrir þessa seinni umferð kosninganna og taldi allar líkur á því að Brasilía yrði næsta fórnarlamb pendúlsveiflu til öfgahægrisins í rómönsku Ameríku sem vandlega hefur verið kynnt undir af utanaðkomandi öflum, Trumpklíkunni, amerískum hvítasunnusöfnuðum, kristnum síonistum og Ísraelistum frá hryðjuverkaríkinu sjálfu.“
Kristinn lýkur færslu sinni á því að segja áframhaldandi stöðu Lula mikilvæga fyrir vonir um mannúðlegri heim.
„Það er mikilvægt að Lula heldur velli. Það sendir vonarglætu í heim þar sem mennskan er á undanhaldi,“ skrifar hann.
Athugasemdir