Danski tónlistarframleiðandinn og listakonan knackered segir við vefsíðuna Wonderland öflugt grasrótarstarf og samheldið tónlistarsamfélag hafa ráðið miklu um þá ákvörðun hennar að flytja til Reykjavíkur aðeins 21 árs gömul. Hún segir borgina hafa veitt sér svigrúm til að þróast sem tónlistarmaður og prófa sig áfram án þess að allt þyrfti að vera fullkomið frá fyrsta degi.
Knackered ólst upp á Norður Jótlandi í Danmörku en flutti til Íslands þegar vinkona hennar komst inn í ljósmyndaskóla í Reykjavík.
„Ég hafði í raun engan áhuga á að fara til Kaupmannahafnar eins og allir hinir,“ segir knackered.
Hún hafi því ákveðið að slá til þegar vinkona hennar hélt til Reykjavíkur. Smæð borgarinnar og öflugt grasrótarstarf hafi strax höfðað til hennar.
„Mér líkaði að þetta er mjög lítil höfuðborg með opið og samheldið tónlistarsamfélag þar sem menning grasrótartónlistar er mjög sterk,“ segir hún.
Fyrstu tónleikarnir með þrjú lög og ljóð
Knackered segir sérstaklega mikilvægt að í Reykjavík hafi hún upplifað að fólk tryði því að hún hefði eitthvað fram að færa. Hún hafi fljótt orðið hluti af tónlistarsenunni og fyrstu tónleikar hennar hér á landi hafi verið á hliðardagskrá Iceland Airwaves árið 2015.
Þá var hún enn skammt á veg komin með eigið tónlistarefni.
„Ég held að ég hafi verið með þrjú fullunnin lög á þeim tíma og fyllti restina af settinu með ljóðum,“ segir hún.
Að hennar mati sé einmitt þannig hægt að þroskast sem tónlistarmaður. Listafólk þurfi að þora að koma fram og prófa sig áfram í stað þess að bíða eftir því að allt verði fullkomið.
„Farðu bara af stað. Tónlistin þín þarf ekki að vera fullkomin frá upphafi,“ segir knackered og bætir við að slíkt krefjist þó samfélags sem sé tilbúið að styðja við listafólk. Það hafi hún fundið í Reykjavík.
Eitt af því sem hún kunni best að meta við borgina sé hversu hratt sé hægt að hrinda hugmyndum í framkvæmd. Tónleikar, viðburðir og samstarfsverkefni geti orðið að veruleika með mjög skömmum fyrirvara þar sem fólk sé tilbúið að leggja fram tíma sinn og hæfileika.
Hún nefnir sem dæmi að þegar hana vantaði klæðnað fyrir viðburði tengda Echolalia í sumar hafi hún haft samband við fatahönnunarmerkið Vecct. Strax daginn eftir hafi samstarfið verið komið á.
Sköpunarkrafturinn geti þó tekið sinn toll. Knackered lýsir sumrinu í Reykjavík sem linnulausu tímabili þar sem tónlistarfólk spili ótal tónleika, stofni nýjar hljómsveitir, gefi út tónlist og komi nýjum verkefnum af stað.
Hún telur birtuna eiga stóran þátt í þessari miklu virkni. Tilfinningin sé sú að allt þurfi að gerast strax áður en veturinn skellur á. Á veturna hægist síðan á og tími gefst til að melta reynslu sumarsins og undirbúa ný verkefni.
„Við þurfum að láta allt gerast NÚNA áður en veturinn kemur,“ segir hún.
Knackered segist kunna vel við þessa árstíðabundnu hringrás. Þrátt fyrir að veturinn eigi að vera rólegri sé þó sjaldnast algjört hlé á tónlistarlífinu. Hún segist til að mynda sækja tónleikastaðinn Mengi nánast vikulega allt árið til að sjá vini sína koma fram.
Sérstakt kvöld með Björk og Arca
Knackered gaf út sína fyrstu EP plötu, „fyi“, á síðasta ári og hefur síðan vakið aukna athygli. Í sumar kom hún fram á Echolalia ásamt meðal annars Björk og Arca. Hún hefur einnig verið valin tónleikalistamaður ársins hjá The Reykjavík Grapevine.
Knackered segir það hafa verið sérstaka upplifun að koma fram fyrir stóran áheyrendahóp ásamt listafólki sem hún ber virðingu fyrir. Þrátt fyrir umfang viðburðarins hafi stemningin þó á margan hátt minnt á hefðbundið kvöld í miðborg Reykjavíkur.
„Við þekkjum öll hvert annað og styðjum hvert annað,“ segir hún.
Hún segir sérstaklega mikilvægt að Björk hafi sýnt íslensku grasrótarsenunni traust og gefið listafólki þaðan tækifæri til að koma fram fyrir fjölmennan hóp.
„Mér fannst ótrúlega sérstakt að fá tækifæri til að spila tónlistina mína fyrir svona stóran áheyrendahóp á Íslandi ásamt vinum mínum,“ segir knackered.
Það hafi að hennar mati verið mögulegt vegna trausts Bjarkar á tónlistarsenunni og þeirrar virðingar sem hún beri fyrir starfinu sem þar fer fram.
„Mér finnst það svo dýrmætt,“ segir knackered.
Athugasemdir