Átta búddamunkar létust og yfir tuttugu manns slösuðust þegar 11 ára drengur ók pallbíl foreldra sinna inn í trúargöngu í norðausturhluta Taílands í dag
Slysið varð í Mukdahan-héraði þar sem 35 munkar og fimm aðrir voru á pílagrímsferð og gengu meðfram vegi þegar pallbíllinn ók á hópinn.
Að sögn lögreglu hafði drengurinn tekið bíl foreldra sinna í leyfisleysi. Hann missti stjórn á ökutækinu með þeim afleiðingum að það hafnaði á gönguhópnum.
Fimm munkar voru úrskurðaðir látnir á vettvangi en þrír til viðbótar létust síðar á sjúkrahúsi af sárum sínum.
Einn munkanna sem lifði slysið af, Phra Sompong, lýsti atvikinu í myndskeiði sem björgunarsveitarmenn birtu á samfélagsmiðlum. Hann sagðist hafa séð pallbílinn nálgast á meðan hann hugleiddi. Skömmu síðar hefði bíllinn ekið á hópinn á miklum hraða.
Hann sagði að sér og öðrum munki hefði tekist að stökkva frá á síðustu stundu en að þeir sem urðu fyrir bílnum hefðu kastast upp í loftið við höggið.
Öryggismyndavél við nærliggjandi hús náði atvikinu. Á upptökunni sést hópur munkanna ganga meðfram veginum áður en hávær árekstur heyrist og göngunni lýkur skyndilega.
Samkvæmt heilbrigðisyfirvöldum eru fjórir munkar enn í lífshættu á sjúkrahúsi í Mukdahan. Tíu til viðbótar slösuðust alvarlega og fleiri hlutu minni háttar áverka og fá meðferð.
Lögregla rannsakar nú tildrög slyssins, þar á meðal hvernig drengnum tókst að komast yfir bifreið foreldra sinna og hvað olli því að hann missti stjórn á henni.
