Að minnsta kosti sextán létust þegar farþegarúta með 78 manns innanborðs valt í suðvesturhluta Suður-Afríku í morgun. Meðal hinna látnu eru börn, samkvæmt upplýsingum frá lögreglu og samgönguyfirvöldum landsins.
Slysið varð á leið rútunnar frá Höfðaborg til bæjarins Idutywa. Samkvæmt upplýsingum frá stjórnvöldum missti ökumaður stjórn á rútunni eftir að hafa reynt að sveigja frá sendibifreið til að forðast árekstur. Í kjölfarið valt rútan út af veginum.
Flestir hinna látnu voru úrskurðaðir látnir á vettvangi. Lögregla segir að meðal þeirra hafi verið sjö karlar, fimm konur og þrjú börn. Misræmi er þó í fyrstu upplýsingum um nákvæman fjölda fórnarlamba og yfirvöld hafa staðfest að hið minnsta sextán hafi farist.
Fjöldi slasaðra var fluttur á sjúkrahús til aðhlynningar en samkvæmt yfirvöldum afþökkuðu 43 farþegar læknisaðstoð. Ekki hefur verið skýrt hvers vegna þeir kusu að þiggja ekki meðferð.
Lögregla hefur hafið rannsókn á orsökum slyssins og mun meðal annars kanna aðstæður á vettvangi, ástand ökutækjanna og hvort aðrir þættir hafi átt þátt í slysinu.
Suður-Afríka glímir áfram við háa tíðni banaslysa í umferðinni þrátt fyrir að búa yfir einu þróaðasta vegakerfi Afríku.
Samkvæmt tölum stjórvalda létust 11.485 manns í umferðarslysum í Suður-Afríku árið 2025. Það var rúmlega fimm prósenta fækkun frá árinu á undan, en flestir þeirra sem létust voru gangandi vegfarendur.
