Bandaríski grínistinn og samfélagsmiðlastjarnan Laura Clery segist einstaklega heppin að hafa sloppið án beinbrota eftir að um 270 kílóa ísskápur féll yfir hana á heimili hennar fyrr í vikunni.

Clery greindi frá slysinu í myndbandi sem hún birti á samfélagsmiðlum þar sem hún sást í sjúkrabíl með hálskraga eftir að sjúkraflutningsmenn komu henni til hjálpar. Þar spurði hún slökkviliðsmenn í léttum tón hvort rétt væri að hún hefði verið kramin undir „600 punda ísskáp“.

Í færslu á Instagram þakkaði hún slökkviliðs- og björgunarfólki fyrir skjót viðbrögð og kallaði þau „sannar hetjur“. Samkvæmt Clery þurftu slökkviliðsmenn að brjóta upp bílskúrshurð til að komast inn og lyfta ísskápnum af henni.

Að sögn Clery var hún ein heima með börnum sínum tveimur þegar slysið varð. Hún segir ísskápinn skyndilega hafa fallið yfir sig og klemmt hana upp við eldhúsborð þannig að hún gat hvorki hreyft sig né andað eðlilega.

Fyrrverandi eiginmaður hennar, Stephen Hilton, sagði jafnframt frá því að hún hefði sent honum örvæntingarfull skilaboð á meðan á atvikinu stóð þar sem stóð meðal annars: „Ég er að deyja. Komdu strax.“

Clery heldur því fram að ísskápurinn hafi ekki verið rétt festur við vegg og kennir hún vanrækslu verktaka um slysið. Hún segir jafnframt að sjö ára sonur hennar hafi óvart komið af stað hreyfingu á tækinu þegar hann klifraði á því.

Þrátt fyrir alvarlegt atvik segir Clery að hvorki hún né börn hennar hafi slasast alvarlega og kveðst hún afar þakklát fyrir hvernig fór.