Saksóknarar í Tyrklandi hafa hafið rannsókn á hinum 95 ára gamla auðkýfingi Rahmi Koç, heiðursformanni Koc Holding, stærsta samstæðu landsins, vegna brandara sem hefur verið harðlega gagnrýndur fyrir að vera bæði kynferðislega niðrandi og rasískur.

Brandarinn var sagður við opnun sjúkrahúss í strandborginni Izmir á föstudag. Myndskeið af ummælunum fór fljótt í dreifingu á samfélagsmiðlum og vakti mikla reiði. Brandarinn snerist um misskilning milli kúrdískrar konu og læknis.

Dómsmálaráðherra Tyrklands, Akin Gürlek, staðfesti á samfélagsmiðlinum X að rannsókn hefði verið hafin vegna ummæla sem talin væru beinast gegn konum og ákveðnum þjóðernishópi.

Kúrdíski stjórnarandstöðuflokkurinn DEM hefur jafnframt lagt fram kæru á hendur Koç og sakar hann um hatursorðræðu og mismunun.

Í kjölfar gagnrýninnar baðst Koç afsökunar og sagði að ummælin hefðu ekki verið ætluð til að særða eða beina spjótum að neinum hópi.

Rahmi Koç er einn auðugasti maður Tyrklands. Samkvæmt Forbes er auður hans metinn á um 2,4 milljarða Bandaríkjadala.